عبدالحئی کاکڑ بی بی سی اردو ڈاٹ کام، پشاور

	صوبہ ہلمند کے شہر واشیر میں افغان پولیس کمانڈر سمیت تیس اہلکاروں کو پکڑا ہے: طالبان

طالبان کے ترجمان قاری محمد یوسف نے ایک نامعلوم مقام سے بی بی سی اردو ڈاٹ کام کو بتایا کہ اتوار کو طالبان نے صوبہ ہلمند کے شہر واشیر پر حملہ کیا
تھا جس میں افغان پولیس کے کمانڈر لعل محمد سمیت تیس اہلکار پکڑے گئے تھے۔

انہوں نے دعویٰ کیا کہ افغان پولیس سے بھاری اسلحہ اور پانچ گاڑیاں قبضہ
میں کر لی گئی ہیں جبکہ طالبان نے واشیر شہر کا قبضہ دوبارہ حاصل کر لیا ہے۔

قاری یوسف نے حملہ کی تفصیلات بتاتے ہوئے دعوی کیا’واشیر کا علاقہ گزشتہ دو ماہ سے طالبان کے زیر قبضہ تھا لیکن سنیچر کو افغان پولیس نے جب حملہ کیا تو طالبان نے ایک حکمت عملی کے تحت شہرکو خالی کر دیا تھا تاہم طالبان نے اتوار کو دوبارہ حملہ کیا جس میں افغان پولیس کے اہلکار بھاری اسلحے اورگاڑیوں سمیت پکڑے گئے‘۔

صوبہ ہلمند کے پولیس سربراہ نبی جان ملاخیل نے طالبان کے اس دعویٰ کی تردید کی ہے۔

نبی جان ملاخیل کے مطابق واشیر میں قبائلی مشران اور مقامی انتظامیہ کے درمیان کچھ اختلافات تھے جو اب رفع ہو گئے ہیں۔

طالبان کا دعویٰ ہے کہ جنوبی افغانستان کے کئی صوبے ان کے کنٹرول میں ہیں جبکہ افغان حکام اس کی تردید کرتے رہے ہیں۔

واضح رہے کہ طالبان نے تقریباًً بارہ دن قبل جنوبی صوبہ ہلمند کے اہم شہر موسی قلعہ پر قبضہ کر لیا تھا جو اب تک بدستور قائم ہے۔ افغان حکام نے طالبان کے قبضہ کی تصدیق کی تھی۔