سعودی عرب فلسطینی گروہوں کو متحد کرنے کی کوشش کر رہا ہے

فلسطینی رہنماؤں نے اس امید کا اظہار کیا ہے کہ وہ ایک متحدہ فلسطینی
حکومت کے قیام میں کامیاب ہو جائیں گے۔

حماس کے رہنما خالد مشعال نے کہا ہے کہ وہ اس وقت تک مکہ میں رہیں گے جب تک معاہدہ ہو نہیں جاتا۔خالد مشعال نے عالمی برادری سے اپیل کی ہے کہ وہ امن قائم کرنے کی کوششوں کی حمایت کریں۔

اس سے قبل سعودی عرب کے بادشاہ شاہ عبداللہ نے فلسطین کے متحارب دھڑوں کے رہنماؤں نے سے الگ الگ ملاقاتیں کیں۔

اطلاعات کے مطابق فلسطینی اتھارٹی کے صدر محمود عباس اور حماس کے لیڈر خالد مشعال اور اسماعیل ہنیہ نےشاہ عبد اللہ سے الگ الگ ملاقات کی۔

مبصرین کا کہنا ہے مکہ میں ہونے والے مذاکرات متحارب فلسطینی گروہوں میں اتحاد کا آخری موقع ہے۔

سعودی بادشاہ سے علیحدہ علیحدہ ملاقات کے بعد الفتح کے محمود عباس اور حماس کے لیڈر خالد مشعال کے درمیان ملاقات متوقع ہے جس میں وہ متحدہ فلسطینی حکومت بنانے کے معاملات کو طے کرنے کی کوشش کریں گے۔

فلسطینی گروہوں میں پچھلے کئی ہفتوں سے جاری جھڑپوں میں درجنوں لوگ ہلاک ہو چکے ہیں۔

فلسطینوں کا خیال ہے کہ الفتح اور حماس کی متحدہ حکومت کی صورت میں وہ اسرائیل کے خلاف زیادہ فعال مدافعت کرنے کے قابل ہوں گے اور ان فلسطینی پر عالمی پابندیاں کو جاری رکھنے کا جواز بھی ختم ہو جائے گا۔

بی بی سی کے مشرق وسطیٰ کے نامہ نگار جرمی بوون کا کہنا ہے کہ فلسطینی گروہوں میں تعاون کی راہ میں حائل سب سے بڑی روکاٹ اسرائیل کے وجود کو تسلیم کرنا اور فلسطینی اتھارٹی میں عہدوں کی تقیسم ہے۔

حماس نے ابھی تک اسرائیل کو تسلیم کرنے سے انکار کیا ہے جبکہ الفتح اسرائیل کے وجود کو تسلیم کرتی ہے۔