پولیس پہلے اس حملے کو خودکش حملہ قرار دے رہی تھی

یہ دھماکہ بغداد کے شیعہ اکثریتی الصدریہ ڈسٹرکٹ کے ایک بازار میں کیا گیا جہاں لوگ رات کے کرفیو سے قبل اشیائے خوردونوش خرید رہے تھے۔ یہ بازار اس سے قبل بھی حملوں کا نشانہ بن چکا ہے۔ بی بی سی کے نمائندے مائیک وولرج کے مطابق پولیس پہلے اس حملے کو خودکش حملہ قرار دے رہی تھی تاہم اب اس کا کہنا ہے کہ ٹرک بازار میں کھڑا کیا گیا تھا۔

دھماکہ اس قدر زور دار تھا کہ اس سے اردگرد کے سٹالز تباہ ہوگئے اور زمین میں گہرا گڑھا پڑ گیا۔ امدادی کارکن ملبے سے انسانی اعضاء، لاشیں اور زخمیوں کو نکال کر پک اپ ٹرکوں کے ذریعے ہسپتالوں تک پہنچاتے رہے۔

الصدریہ کے نزدیک واقع ابن النفیس ہسپتال کے وارڈ اور راہداریاں جلد ہی لاشوں اور زخمیوں سے بھر گئے جبکہ متاثرین کے رشتہ داروں کی چیخ و پکار دور دور تک سنی جاسکتی تھی۔ ایک زخمی نے بتایا کہ جب دھماکہ ہوا تو وہ الصدریہ میں اپنی دکان پر تھا۔ دھماکے کی شدت سے دکان کی چھت اس پر آگری اور وہ بے ہوش ہوگیا۔

عراقی وزیر اعظم نوری المالکی نے دھماکے کی ذمہ داری سابق عراقی صدر صدام حسین کے حامیوں اور دیگر شدت پسندوں پر عائد کی ہے۔

اس کےعلاوہ عراق کے شمالی شہر کرکوک میں سنیچر کو دو گھنٹوں کے دوران سات سلسلہ وار کار بم دھماکوں میں کم از کم پانچ افراد ہلاک اور چالیس زخمی ہوئے ہیں۔

	کرکوک میں ایک ہی ساتھ سات بم دھماکے کیے گئے

دریں اثناء پولیس کا یہ بھی کہنا ہے کہ سمارا میں پولیس کی ایک حفاظتی چوکی پر حملے میں چھ پولیس اہلکار ہلاک اور چھ زخمی ہوئے ہیں۔

نومبر میں بغداد کے صدر سٹی میں کیے گئے دھماکے میں دو سو سے زائد افراد ہلاک ہوئے تھے جبکہ بغداد ہی کے ایک مصروف بازار میں 22 جنوری کو پھٹنے والے بم سے 88 افراد لقمہ اجل بن گئے تھے۔

امریکی حکام بغداد میں مزید 21500 فوجی تعینات کرنے کا ارادہ رکھتے ہیں۔ سن 2003 میں امریکی قبضے کے بعد سے یہ اب تک کا کیا جانے والا سب سے بڑا انفرادی دھماکہ ہے۔

سنیچر کو عراق کے شیعہ رہنما آیت اللہ السیستانی نے لوگوں سے اپیل کی ہے کہ وہ فرقہ واریت چھوڑ کر متحد ہوجائیں۔