عراق میں تشدد کی وجہ سے لوگ بڑی تعداد میں خطے کے دیگر ممالک کا رخ کر رہے ہیں

اس سے قبل حکام نے کہا تھا کہ جمعرات کے روز ایک کار بم دھماکے میں چالیس افراد ہلاک اور اسّی زخمی ہو گئے تھے۔ یہ دھماکہ ایک کاروباری علاقے میں ہوا تھا۔

مقامی کونسل کے سربراہ نے عراقی ٹیلی ویژن کو بتایا کہ رات کو دھماکے سے مرنے والوں کی تعداد میں اضافہ ہوا ہے۔ انہوں نے کہا کہ اس دوران پولیس نے ایک اور بم دھماکے کی کوشش ناکام بھی بنا دی تھی۔

دھماکے سے پہلے بغداد میں گرین زون میں جہاں سرکاری دفاتر واقع ہیں دو مارٹر حملے ہوئے۔

اس سے قبل جمعرات ہی کو شہر کے دو دیگر بازاروں میں حملوں میں کم سے کم پانچ افراد مارے گئے تھے۔

عراق کی وزارت دفاع کا کہنا ہے کہ بدھ کے روز بغداد میں امریکی اور عراقی افواج نے تیس مزاحمت کاروں کو ہلاک کر دیا تھا۔ حکام کا کہنا ہے کہ حیفہ میں لڑائی کے بعد تیس مزاحمت کاروں کو پکڑا بھی گیا ہے۔