بغداد میں کارروائی کے دوران اپاچی ہیلی کاپٹروں کا استعمال کیا گیا

شارع حیفا کے علاقے میں جو سّنی مسلح افراد کا اڈہ تھا یہ فوجی کارروائی کل علی الصباح شروع کی گئی تھی۔ اپاچی ہیلی کاپٹروں کے ساۓ میں فوجیوں نے ہلہ بولا جن کا کہنا ہے کہ مورٹر توپوں، گرینیڈ اور مشین گنوں سے ان پر حملہ کیا گیا۔

حیفہ میں یہ کارروائی صدر بش کی طرف سے اس اعلان کے چند گھنٹوں بعد میں عمل میں لائی جس میں انہوں نے اپنی عراق پالیسی کو ایک موقع اور دینے کی اپیل کی تھی۔

عراقی حکومت کہتی ہے کہ تیس مزاحمت کار ہلاک کیے گۓ اور ستائیس کو پکڑ لیا گیا جن میں بہت سے دوسرے عرب ملکوں کے افراد بھی ہیں۔ اطلاعات کے مطابق ایک امریکی فوجی ہلاک ہوا۔

ادھر عراق میں مسلح افراد نے ایک پروفیسر کو گولی ماردی ہے جن کا اس لۓ بہت احترام کیا جاتا تھا کہ وہ غریبوں کو چھوٹے موٹے قرض دلوا کر ان کے کاروبار میں مدد کرتے تھے۔

پروفیسر دِیا المُقیطر کے سر اور سینے پر کئی گولیاں ماری گئیں۔ شرقیہ ٹیلیوژن پر وہ اکثر غریبوں کے انٹرویو کرکے چھوٹے چھوٹے کاروبار کے لۓ ان کی راۓ پوچھتے تھے۔

امریکہ کی طرف سے نئی حکمت عملی کے تحت جن علاقوں میں شدت پسندوں کا زور ہے وہاں سے شدت پسندوں کو نکال کر ان کی مستقل نگرانی کی جائے گی اوروہاں سے فوجوں کو واپس نہیں نکالا جائے گا۔

صدر بش کی طرف سے عراق میں مزید اکیس ہزار پانچ سو فوجیوں کے تعینات کرنے کے فیصلے کے تحت تین ہزار دو سو فوجی پہلے ہی عراق پہنچ چکے ہیں۔