عراقی حکومت کے ترجمان کے مطابق پھانسی کے نتیجے میں برزان تکریتی کا سر تن سے جدا ہو گیا تھا

عراقی حکومت کے ایک ترجمان کے مطابق دونوں کو پھانسی دیئے جانے کے دوران اگرچہ کوئی پر تشدد کارروائی نہیں ہوئی، لیکن برزان تکریتی کا سر تن سے جدا ہو گیا تھا۔ ’ایسا کم ہی ہوتا ہے لیکن یہ کوئی انوکھی بات نہیں‘۔

خیال کیا جا رہا ہے کہ دونوں کو اسی جگہ پھانسی دی گئی جہاں تیس دسمبر کے روز صدام حسین کو پھانسی دی گئی تھی۔ امریکی خبر رساں ادارے ایسوسی ایٹڈ پریس نے عراقی حکومت سے تعلق رکھنے والے استغاثہ کے سب سے بڑے وکیل منقط الفارون کے حوالے سے کہا ہے کہ دونوں کو طلوعِ آفتاب سے پہلے پھانسی چڑھایاگیا۔

بہتر طرز عمل  پھانسی دیئے جانے کے موقع پر موجود تمام لوگوں نے بہتر طرز عمل اختیار کرنے کا حلف دیا ہوا تھا ترجمان عراقی حکومت

عراق کے صدر جلال طالبانی نے سابق عراقی رہنما صدام حسین کے دو ساتھیوں کو پھانسی دینے کے حکم پر عمل درآمد کو مؤخر کرنے کا مطالبہ کیا تھا۔ عراقی صدر مجرموں کی سزا کو بدلنے یا ان میں تاخیر کا اختیار نہیں رکھتے۔

صدا م حسین کی متنازعہ پھانسی کا حوالہ دیتے ہوئے صدر طالبانی نے کہا تھا کہ موجودہ حالات پھانسی کی سزا کے لیے سازگار نہیں ہیں۔

لیکن عراقی حکومت کے ترجمان کا کہنا تھا کہ مجرموں کے ’ڈیتھ وارنٹ‘ پر دستخط ہو چکے تھے اور اب اس پر عملدرآمد کر دیا گیا ہے۔ ان کے مطابق تاہم اس دفعہ پھانسی دیئے جانے کے موقع پر موجود تمام لوگوں نے بہتر طرز عمل اختیار کرنے کا حلف دیا ہوا تھا۔