عراق میں قیدیوں پر تشدد کے واقعات کی وجہ سے رمز فیلڈ کو ایک مقدمے کا بھی سامنا ہے

امریکی وزارتِ دفاع پینٹاگون میں ایک الوداعی تقریب میں وزارتِ دفاع کے اہلکاروں سے بات کرتے ہوئے انہوں نے کہا کہ عراق اور افغانستان میں سیاسی اور اقتصادی اقدامات بھی اٹھانے پڑیں گے۔

انہوں نے کہا کہ اقتصادی اور سیاسی اقدامات وقت طلب ہوں گے اور ان اقدامات کے کامیاب ہونے تک امریکی عوام کو صبر سے کام لینا ہوگا۔

اس تقریب میں انہوں نے کہا وزیر دفاع کے طور پر ان کا بدترین دن وہ تھا جب انہوں نے عراق کے ابوغریب جیل میں امریکی فوجیوں کی طرف سے قیدیوں پر مظالم کی خبر سنی۔ انہوں نے کہا کہ ابو غریب کے واقعات پر انہوں نے دو مرتبہ استعفیٰ دینے کی پیش کش کی تھی۔

وزارتِ دفاع میں اپنے پانچ سالہ دور پر تبصرہ کرتے ہوئے انہوں نے کہا کہ ان کےپانچ برس دور رس تاریخی اثرات کے حامل ہیں۔انہوں نے ان پانچ برسوں کو انتہائی مشکل بھی قرار دیا۔

انہوں نےکہا کہ وزارتِ دفاع میں ان کا بہتریں دن غالباً آٹھ دسمبر تھا جب ان کے بعد وزیر دفاع نامزد ہونے والی رابرٹ گیٹس نے اپنے عہدے کا چارج سنبھالا تھا۔
دریں اثنا امریکہ میں انسانی حقوق کی تنظیموں نے رمز فیلڈ اور کئی دوسرے امریکی جرنیلوں پر عراق اور افغانستان میں قیدیوں پر تشدد کرنے کے الزامات پر مقدمہ قائم کیا ہے۔ اس مقدمے کی سماعت آئندہ چند دنوں میں شروع ہو رہی ہے۔