جیمز بیکر اور لی ہیملٹن نے امریکی سینٹ سے خطاب کیا

اس سلسلہ میں گروپ کے سربراہ اور سابق وزیر خارجہ جیمز بیکر اور ان کے ساتھی لی ہیملٹن نے امریکی سینٹ سے خطاب کیا۔ اپنے خطاب میں جیمز بیکر نے کہا کہ انہوں نے جو انہتر تجاویز پیش کی ہیں وہ کوئی پھلوں کا سلاد نہیں کہ جس میں سے امریکی انتظامیہ جو چاہے لے لے جو چاہے چھوڑ دے۔

انہوں نے کہا کہ ان کی تجاویز ان تمام مسائل کا ایک جامع حل پیش کرتی ہیں جو امریکہ کو عراق اور دیگر مشرق وسطٰی میں درپیش ہیں اس لیے تمام کی تمام تجاویز کواکٹھا قبول کیا جانا چاہیے۔

اس بارے میں واشنگٹن میں بی بی سی کے نامہ نگار کا کہنا ہے کہ لگتا ہے کہ صدر بُش جیمز بیکر کے اس استدلال سے متاثر نہیں ہوں گے کیونکہ لگتا ہے کہ صدر بُش گروپ کی دو اہم تجاویز کو پہلے ہی رد کر چکے ہیں، یعنی عراق سے امریکی فوجوں کی واپسی میں تیزی اور شام اور ایران کے ساتھ غیر مشروط براہ راست مذاکرات۔

امریکی صدر کا ردعمل اب تک بہت حوصلہ افزاء نہیں ہے اور انہوں نے یہ واضح کردیا ہے کہ نہ تو وہ اور ان کی انتظامیہ اور نہ ہی امریکی کانگریس اس رپورٹ کی تمام سفارشات ماننے کے پابند ہیں۔

صدر بش کا کہنا ہے کہ ایران اور شام کو اپنا راستہ منتخب کرنا ہے۔ ’اگر وہ امریکہ کے ساتھ مذاکرات کی میز پر آنا چاہتے ہیں تو یہ تو بڑا آسان ہے۔ان کو کچھ فیصلے کرنا ہوں گےجو امن میں مدد دیں نہ کہ جنگ اور لڑائی میں۔‘