مسعود بارزانی نے رپورٹ کو عراق آئین سے متصادم قرار دیا

مسعود بارزاني نے عراق سڈی گروپ کی اس رپورٹ پر تبصرہ کرتے ہوئے عراق کے ہمسایہ ملکوں ایران اور شام سے عراق میں حالات بہتر کرنے کے لیے مذاکرات کرنے کی تجویز پر خدشات کا اظہار کیا ہے۔ وہ کردوں کی خودمختاری کم کرنے کی بات سے متفق نہیں ہیں۔

مسعود بارزانی کی بات کی تائید عراق کے کرد صدر جلال طالبانی نے بھی کی ہے۔

اس سے قبل عراق میں امریکی فوج کے ایک کمانڈر نے کہا کہ عراق سے سن دوہزار آٹھ کے شروع میں عراق سے کچھ امریکی فوج کو واپس بلایا جاسکتا ہے۔

عراق سٹڈی رپورٹ  گروپ کے ارکان نے رپورٹ مرتب کرنے سے پہلے عراق کے شمالی کرد علاقوں کا دورہ نہیں کیا جو اس رپورٹ میں ایک بڑی کمزوری ہے۔ مسعود بارزانی

امریکی صدر بش بھی رپورٹ کے اجراء کے بعد یہ بات کہہ چکے ہیں کہ عراق میں نئی حکمت عملی وضح کرنے کی ضرورت ہے۔ تاہم انہوں نے بات بھی واضح طور پر کہہ دی ہے کہ عراق سٹڈی گروپ کی طرف سے تمام تجاویز پر وہ عملدرآمد نہیں کریں گے۔

کردوں کی طرف سے اس رپورٹ پر ردعمل میں مسعود بارزاني نے کہا کہ کرد اس رپورٹ کے پابند نہیں ہیں۔

مسعود بارزاني نے کہا کہ اس گروپ کے ارکان نے رپورٹ مرتب کرنے سے پہلے عراق کے شمالی کرد علاقوں کا دورہ نہیں کیا جو اس رپورٹ میں ایک بڑی کمزوری ہے۔

انہوں نے رپورٹ میں عراق کی مرکزی حکومت کو مضبوط کرنے پر تنقید کی اور کہا کہ یہ تجویز وفاقیت کے اور آئین کے اصولوں سے متصادم ہے جن پر نئے عراق کی تعمیر نو ہونی ہے۔

انہوں نے رپورٹ کو نامناسب قرار دیتے ہوئے کہا کہ وہ کسی ایسی تجویز کو قبول کرنے کو تیار نہیں ہیں جو آئین کے منافی ہو اور جو عراقی اور کرد عوام کے مفادات کے خلاف ہو۔

صدر جلال طالبانی کے دفتر سے جاری ہونے والے ایک بیان میں کہا گیا کہ رپورٹ کی کئی تجاویز عراقی حکومت کی پالیسی سے مطابقت نہیں رکھتیں۔

صدر بش نے امریکی کانگرس کے ارکان سے ملاقات میں کہا ہے کہ وہ دونوں جماعتوں کے ارکان کے مشورے سے عراق کے معاملے پر نئی راہ تلاش کریں گے۔