اسرائیلی وزیرِ اعظم نے جنگ بندی کو خطے میں ایک نئی ابتدا قرار دیا ہے

تاہم سرحد کے دونوں طرف کے عام لوگوں کا خیال ہے کہ انہیں شک ہے کہ شاید ہی فلسطینی علاقوں سے راکٹ باری اور اسرائیل کی جانب سے در اندازی ختم
ہو سکے۔

اس سے قبل کی خبروں کے مطابق غزہ سے اسرائیلی علاقے پر میزائیل فائر کرنے سے اسرائیل اور فلسطینی گروپوں کے مابین جنگ بندی کے معاہدے کو خطرات لاحق ہو گئے تھے۔

اسرائیل اور فلسطینی گروپوں کے درمیان جنگ بندی کے چند گھنٹوں کے بعد غزہ کے علاقے سے تین میزائیل فائر کیے گئے جو اسرائیلی قصبے سیدورت میں گرے لیکن ان سے کوئی جانی یا مالی نقصان نہیں ہوا۔

جنگ بندی پر عمل درآمد اتوار کو مقامی وقت کے مطابق صبح چھ بجے شروع ہوا۔

اسرائیل کے وزیر اعظم ایہود اولمرٹ نے کہا کہ اسرائیل میزائیل فائر کیے جانے کے باوجود صبر کا دامن نہیں چھوڑے گا۔

اس سے پہلے اسرائیل اور فلسطینی گروپوں نے غزہ میں پر تشدد کارروائیاں بند کرنے پر اتفاق کیا تھا۔

امریکہ نے غزہ میں جنگ بندی کا خیر مقدم کیا ہے اور وائٹ ہاؤس کے ایک ترجمان نےایک مثبت قدم قرار دیا ہے۔

فلسطینی رہنما محمود عباس نے تمام شدت پسند گروپوں سے یہ یقین دہانی حاصل کی ہے کہ وہ غزہ سے اسرائیل پر راکٹ حملے بند کر دیں گے۔

اس کے جواب میں اسرائیل کے وزیر اعظم ایہود اولمرٹ نے تمام فوجی کارروائیاں بند کرنے پر آمادگی ظاہر کی ہے۔

بی بی سی کے نامہ نگاروں کے مطابق یہ اعلان غیر متوقع اور ایک بہت بڑی پیش رفت ہے۔

اسرائیل کہتا رہا ہے کہ غزہ میں اس کی فوجی کارروائیوں کا مقصد فلسطینی علاقے سے کیے جانے والے راکٹ حملوں کو روکنا ہے۔

اس سے پہلے پیر کو غزہ پر ایک اسرائیلی ہوائی حملے میں کم از کم ایک حماس کارکن ہلاک ہو گیا۔

فلسطینی حکام کے مطابق حملے میں دو کاروں کو نشانہ بنایا گیا۔ حملے میں چار افراد زخمی بھی ہوئے۔