عبدل حمید کوالالمپور، ملائشیا

	کئی پاکستانی اپنی شناخت تک بتانا نہیں چاہتے

ان نوجوانوں کے پاس کھانے کیلئے رقم نہیں ہے، اپنے گھر واپس پاکستان جانے کا کرایہ نہیں ہے اور انہیں پولیس کا ڈر ہے کہ کہیں یہ گرفتار ہوکر سلاخوں کے پیچھے نہ سڑتے رہیں۔

ملائشیا کی جیلوں میں اذیت رسانی کے اپنے طریقے ہیں جن میں سب سے اذیت ناک سزا یہ ہے کہ یہاں قیدی کو سونے نہیں دیا جاتا۔ ہر قیدی کے لیے ضروری ہے کہ وہ روزانہ سو عدد مکھیاں پکڑے۔ جب تک وہ سو مکھیاں نہیں پکڑے گا سوئے گا نہیں کیونکہ مکھیاں پوری نہ ہونے کی صورت میں قیدی پر تشدد لازمی ہے۔ ہاں جو قیدی نگران کی مٹھی گرم کر دے تو نگران اس کو کوئی میٹھی چیز لا دے گا۔ پریشان نہ ہوں، یہ میٹھی چیز قیدی کے کھانے کے لیے نہیں بلکہ مکھیوں کی دعوت کیلئے ہوتی ہے تاکہ قیدی جلد مکھیاں پوری کرلے اور اپنی نیند پوری کر سکے۔

یہ ان پاکستانی نوجوانوں کی کہانی ہے جنہیں دیارِ غیر میں اعلیٰ روزگار کے خواب دکھائے گئے اور ان سے آٹھ سے دس لاکھ روپے فی کس وصول کیے گئے۔اتنی خطیر رقم کے بندوبست کے لیے کسی نے اپنی ماں کا زیور بیچا، کسی نے بہن کی شادی کےلیے جمع کی ہوئی رقم ٹھکانے لگائی تو کسی کے باپ نے کوڑی کوڑی جوڑ کر اور قرض لے کر اپنے لختِ جگر کو اعلیٰ مستقبل کی تلاش میں سمندر پار بھیج دیا۔

	کوالالمپور کے بے سرو سامان پاکستانی مسجدوں میں پناہ ڈھونڈتے ہیں

ان نوجوانوں کو کراچی سے کوالالمپور لیجایا جاتا ہے۔ کچھ دن کسی تیسرے درجہ کے ہوٹل میں رکھا جاتا ہے جس کے بعد انہیں بتایا جاتا ہے ابھی آسٹریلیا اور نیوزی لینڈ جانے میں دیر اسلئے ہے کہ آجکل سختی بہت ہے۔ اس وقت تک ان نوجوانوں کا ملائشیا کا ویزا ختم ہو چکا ہوتا ہے۔ اسی دوران کئی نوجوانوں کا سودا کسی فیکٹری کے ساتھ کر دیا جاتا ہے۔ یہ افراد اب غیر قانونی طور پر ملائشیا میں رہ رہے ہوتے ہیں لہٰذا ان نوجوانوں کو گرفتاری سے ڈرا کر فیکٹریوں سے باہر آنے سے روک دیا جاتا ہے اور چمکتے دمکتے کوالالمپور میں یہ فیکٹریاں ان مجبور نوجوانوں کے لیے خرکار کیمپ ثابت ہوتی ہیں۔ تنخواہ صرف اتنی ملتی ہے کہ بمشکل زندہ رہ سکیں۔

	کوالالمپور میں غیر قانونی طور پر رہنے والے پاکستانی گرفتاریوں سے ڈر کر باہر نہیں نکلتے

اس سارے المیہ کوحکومت پاکستان اور اس کا ملائشیا میں موجود سفارتخانہ ایک خاص نظر سے دیکھتا ہے۔ کسی بھی ملک میں سفارتخانے کا بنیادی مقصد اس ملک میں موجود اپنے شہریوں کودرکار سہولتیں بہم پہنچانے کے ساتھ ساتھ اپنے ملک کے مفادات کا تحفظ ہوتا ہے۔ کوالالمپور میں موجود پاکستانی سفارتخانے کا کہنا یہ ہے یہ نوجوان غیر قانونی طور پر یہاں آتے ہیں، اپنے ملک کی بدنامی کا باعث بنتے ہیں لہٰذا یہ نوجوان کسی ہمدردی کے مستحق نہیں ہیں۔

مجھے یہ ساری باتیں گزشتہ ہفتہ اس وقت معلوم ہوئیں جب میں نے جاوا، سماٹرا جاتے ہوئے کچھ وقت ملائشیا میں پیننگ اور کوالالمپورکے شہروں میں گزارا۔ یہ باتیں ان بے بس لوگوں کی زبانی ہیں اور کسی کا نام اس لیے نہیں لکھا کہ لوگ نہیں چاہتے کہ ان کے گھر والوں کو ’وطن‘ میں یہ پتہ چلے کہ وہ کس کسمپرسی کی حالت میں رہ رہے ہیں۔ کئی ایک کے لیے یہ ’عزت کا مسئلہ‘ ہے۔