اس گھر پر امریکی فوج کے چھاپے میں ’تین لوگ ہلاک ہوئے‘

کوفی عان نے کہا کہ امریکہ کا عراق سے انخلاء کا نظام الاوقات ایسا نہیں ہونا چاہیے کہ عراق مزید افراتفری کا شکار ہو جائے۔

انہوں نے شام اور ایران سے بھی کہا کہ وہ اپنے ہمسایہ ملک کی استحکام کے حصول میں مدد کریں۔

منگل کو عراق اور شام نے بیس سال بعد تعلقات بحال کیے۔ عراق اور ایران نے اس اختتام ہفتہ ایران میں ایک سربراہی اجلاس بھی طلب کیا ہے جس میں شام کو بھی شرکت کی دعوت دی گئی ہے۔

امریکہ کے بارے کہا جاتا ہے کہ وہ خطے کے ممالک کے درمیان سفارتکاری کا حامی ہے لیکن مبصرین کے مطابق اس وقت حالات امریکہ اور برطانیہ کے اندازوں اور شاید خواہش سے بھی زیادہ تیزی سے آگے بڑھ رہے ہیں۔

کوفی عنان کا کہنا ہے کہ ’امریکہ رہ بھی نہیں سکتا اور جا بھی نہیں سکتا۔ ایسے بھی لوگ ہیں جن کا کہنا ہے کہ اس کی موجودگی مسئلہ ہے اور ایسے لوگ بھی ہیں جو کہتے ہیں کہ اس کے چلے جانے سے صورتحال زیادہ خراب ہو جائے گی‘۔

عراق میں ایک گھر پر امریکی فوج کے چھاپے کے بعد جس میں اطلاعات کے مطابق ایک لڑکے سمیت تین افراد ہلاک ہو گئے ہیں ایک بار پھر اس کے وہاں سے چلے جانے کا مطالبہ کیا گیا ہے۔

امریکی فوج کا کہنا ہے انہوں نے سات افراد گرفتار کیے ہیں جن میں ایک شدت پسند گروپ کے مبینہ رہنما بھی شامل ہیں جو ایک امریکی فوجی کے اغوا میں ملوث ہیں۔