مڈ ٹرم انتخابات میں ڈیموکریٹس کی کامیابی کے بعد رمز فیلڈ مستعفی ہو گئے تھے

رمز فیلڈ نے گزشتہ ہفتے وزیر دفاع کے عہدے سے استعفیٰ دے دیا تھا۔ ان کے خلاف یہ شکایت وکلاء کے گروپ پر مشتمل امریکی ادارے’ سینٹر فار کونسٹیٹیوشنل رائٹس‘ نے ایک سعودی شہری اور گیارہ عراقیوں کی جانب سے داخل کی ہے۔ سعودی شہری کو کیوبا جبکہ عراقیوں کو بغداد سے گرفتار کیا گیا تھا۔

سینٹر کی جانب سے اس قسم کی ایک شکایت 2004 میں بھی دائر کی گئی تھی تاہم اس وقت اسے خارج کر دیا گیا تھا۔

سینٹر کے صدر کا کہنا ہے کہ اس کیس میں کامیابی کے امکانات زیادہ ہیں کیونکہ مسٹر رمز فیلڈ اب اپنے عہدے پر برقرار نہیں رہے ہیں اور نہ ہی اس کیس کے حوالے سے سیاسی دباؤ ڈالا جا سکتا ہے۔

سعودی شخص محمد القہطانی کی جانب دائر کیے جانے والے کیس کا حوالے دیتے ہوئے ان کا کہنا تھا کہ سینٹر کے پاس 2004 کے مقابلے میں اس وقت کیس کے حوالے سے کافی ثبوت موجود ہیں۔

انہوں نے بی بی سی کو بتایا کہ القہطانی کے بارے میں امریکہ نے الزام لگایا ہے کہ ان کا تعلق القاعدہ سے ہے۔ وہ اس وقت گوانتاناموبے میں ہیں۔

وکلاء کے اس گروپ نے الزام لگایا ہے گوانتاناموبے اور عراق کی ابوغریب جیل میں ہونے والی زیادتیوں کے محرک رمزفیلڈ تھے اور رمزفیلڈ نے ذاتی طور پر قیدیوں پر تشدد کی اجازت دی تا کہ ان سے معلومات حاصل کی جا سکیں۔

	سابق امریکی کمانڈر مقدمے کی اہم گواہ ہوں گی

جینس کرپسنکی اس وقت عراق میں امریکی قیدخانوں کی کمانڈر تھیں جب امریکی فوجیوں کی جانب سے بغداد کی ابو غریب جیل میں قیدیوں سے بدسلوکی کے واقعات منظر عام پر آئے۔

رمز فیلڈ نے گزشتہ ہفتے مڈ ٹرم انتخابات میں ڈیموکریٹک پارٹی کی کامیابی کے بعد اپنے عہدے سے استعفی دے دیا تھا۔ تاہم امریکہ نے گوانتاناموبے میں کسی بھی قسم کے تشدد کی تردید کی ہے اور اپنے تفتیشی طریقہ کار کا دفاع کرتے ہوئے اسے درست قرار دیا ہے۔

ابوغریب جیل میں امریکی فوجیوں کی قیدیوں سے بدسلوکی کی تصاویر کی اشاعت سے دنیا بھر کی توجہ اس جانب مبذول ہو گئی تھی۔