نور المالکی نے ٹی وی پر خطاب میں امید کی ہے کہ صدام کو اپنے کیے کی سزا ملے

عراق کے وزیرِ اعظم نے کہا ہے کہ وہ امید کرتے ہیں کہ صدام حسین کو عراقی عوام کے خلاف جرائم کی وہ سزا ملے جس کے وہ مستحق ہیں۔وہ فیصلے سے ایک روز قبل ٹیلی ویژن پر خطاب کر رہے تھے۔

فیصلے سے پہلے بغداد میں حفاظتی انتظامات سخت کر دیے گئے ہیں۔ اس سے پہلے تمام فوجیوں کی چھُٹیاں منسوخ کرنےکا بھی اعلان کیا گیا تھا۔

بی بی سی کے نامہ نگار کے مطابق بہت کم عراقیوں کا خیال ہے کہ اس فیصلہ سے ملک میں تشدد میں کمی واقع ہو گی۔ گزشتہ تین میں سال میں عراق میں حالات اتنے خراب رہے ہیں کہ ملک میں خانہ جنگی کے امکانات کا ذکر ہونے لگا ہے۔

بغداد سے بی بی سی کے نامہ نگار اینڈریو نارتھ نے کہا کہ ان لوگوں کا بھی جو صدام حسین کو مردہ دیکھنا چاہتے ہیں یہ خیال ہے کہ سابق صدر کو سزا ملنے سے حالات بہتر نہیں ہوں گے۔

بہت سے لوگوں سابق صدر کے خلاف مقدمے میں امریکہ کی دلچسپی کو دیکھتے ہوئے اسے ’فاتح کا انصاف‘ قرار دے رہے ہیں۔ صدام حسین کے وکلاء نے بھی امریکہ میں انتخابات سے چند روز قبل اس مقدمے کا فیصلہ سنائے جانے کو تنقید کا نشانہ بنایا ہے۔

صدام حسین اور ان کے ساتھیوں پر الزام ہے کہ انیس سو بیاسی میں سابق صدر پر ایک قاتلانہ حملے کے بعد انہوں نے ایک سو اڑتالیس شیعہ مسلمانوں کو ہلاک کرنے کا حکم دیا تھا۔