کارٹون بنانے والے ڈنمارک کے لوگوں کی اسلام اور مسلمانوں کے بارے میں نمائندگی نہیں کرتے: وزیر اعظم ڈنمارک

ملک کے وزیر اعظم نے بظاہر ایک سال قبل اسی طرح کے کارٹونوں کی اشاعت کے بعد پیدا ہونے والی صورتحال کو روکنے کے لیئے اس بار مداخلت کی ہے۔

ڈنمارک کی سیاسی جماعت ڈینش پیپلز پارٹی کے کارکنوں کو ٹی وی پر متنازعہ کارٹون بناتے ہوئے دکھایا گیا تھا جن کی عالم اسلام میں مذمت کی گئی۔

ایران اور مصر کی تنظیم اخوان المسلمین نے کہا ہے کہ نئے کارٹون اسلام کی توہین کرتے ہیں۔

ایران نے اتوار کو ڈنمارک کی حکومت سے احتجاج کیا اور کہا کہ یہ بات قابل مذمت ہے کہ ان کے ملک میں ایسے انتہا پسند عناصر ہیں جنہوں نے ڈنمارک کے اسلامی ممالک کے ساتھ تعلقات خراب کرنے کی کوشش کی ہے۔

ایک سال قبل بھی ایسے کارٹونوں کی اشاعت پر زبردست مظاہرے ہوئے تھے جن میں اسلامی ممالک میں پچاس سے زیادہ لوگ مارے گئے تھے۔

ڈنمارک کے وزیر اعظم نے نئے کارٹونوں کو ناقابل قبول کہا اور ساتھ اس بات پر بھی زور دیا کہ وہ ذرائع ابلاغ کو کنٹرول نہیں کر سکتے۔ انہوں نے کہا کہ جن لوگوں نے کارٹون بنائے ہیں وہ ڈنمارک کے لوگوں کی اسلام اور مسلمانوں
کے بارے میں رائے کے بارے میں نمائندگی نہیں کرتے۔

ڈنمارک میں بی بی سی کے نامہ نگار نے کہا کہ ملک میں مسلمان رہنماؤں نے فیصلہ کیا ہے کہ وہ اس تازہ ترین واقعہ سے مشتعل نہیں ہوں گے۔