پوست کی کل عالمی پیداوار کا پچانوے فیصد حصہ افغانستان میں کاشت کیا جارہا ہے

اقوام متحدہ کے انسداد منشیات کے ادارے کے اندازے کے مطابق افغانستان میں چھ ہزار ایک سو ٹن پوست کاشت کی جائے گی جس کا زیادہ تر حصہ طالبان کے زیرِ اثر جنوبی افغانستان میں پیدا ہو گا۔

افغانستان سے پوست کی کاشت ختم کرنے کے لیئے چلائی جانے والی مہم کا امریکہ سب سے بڑا حمائتی اور مدد گار ہے۔

ایک اعلیٰ امریکی اہلکار نے خبردار کیا ہے کہ منشیات کا کاروبار افغانستان کو لے ڈوبے گا۔

منشیات کا دو عشاریہ سات ارب ڈالر کا کاروبار افغانستان کی معیشت کا تیسرا حصہ بنتا ہے۔

ویانا میں تعینات ایک اہلکار کے مطابق افغانستان کے صوبے ہلمند میں جہاں طالبان کی شورش زوروں پر ہے گزشتہ سال پوست کی کاشت میں ایک سو باسٹھ فیصد کا اضافہ ہوا ہے۔

ایک رپورٹ کے مطابق افغانستان کے چونتیس صوبوں میں سے صرف چھ پوست کی کاشت سے پاک ہیں۔

رپورٹ میں کہا گیا ہے کہ افغانستان کے شمال مشرقی علاقوں میں بھی جو جنگجؤ سرداروں کے زیرِ اثر ہیں اور جہاں حکومت کا کنٹرول بہت کمزور ہے پوست کی کاشت میں اضافہ ہوا ہے۔

افغانستان میں دو سال سے کسانوں کو پوست کی جگہ متبادل فصلیں کاشت کرنے کی بڑی مہم چلائی جارہی ہے۔