کم غطاس بی بی سی، بیروت

اور یہ بھی قابل حیرت ہے کہ حزب اللہ کو ابھی تک لبنانی عوام کی بھاری حمایت حاصل ہے اور یہ حمایت اب لبنان سے باہر بھی پھیل رہی ہے۔اگرچہ حزب اللہ کو ہتھیاروں کی فراہمی کے سارے راستے بند ہو چکے ہیں اور لبنان کو جانے والے تمام پل اور سڑکیں بمباری سے تباہ کر دیئے گئے ہیں اس کے باوجود یہ نہیں لگتا کہ حزب اللہ کو کچھ عرصے کے لئے نئے ہتھیاروں کی ضرورت ہے۔

حزب اللہ کے لیڈر حسن نصراللہ المنارٹی وی پر ایک تقریر میں کسی حد تک فائر بندی پر راضی نظر آئے مگر حقیقتاً وہ اپنی جگہ پر ڈٹے ہوئے ہیں۔ حسن نصراللہ نے اپنی تقریر میں کہا کہ خدا کی یہ پارٹی اسرائیل کے دعوؤں کے باوجود ابھی بہت مضبوط ہے۔ حسن کی اس بات سے فوجی ماہرین بھی متفق ہیں۔

سابق فوجی جنرل امین حطاطے کا ماننا ہے کہ حزب اللہ کئی مہینے تک لڑائی جاری رکھ سکتا ہے۔ امین کا یہ بھی کہنا ہے کہ اس گروپ کو گوریلا لڑائی ہی کے لئے تیار کیا جاتا ہے اور وہ یہ اچھی طرح سے جانتے ہیں کہ پل اور سڑکیں تباہ کر دی جائیں گی اسی لئے ہرعلاقے میں ہتھیار کی وافر مقدار موجود ہے۔

یہ بھی سننے میں آیا ہے کہ حزب اللہ کو پہلے ہی سے حملے کا شک تھا اس لئے اس نے کافی ہتھیار اکٹھے کر رکھے تھے۔

ٹیمر گوکسل حزب اللہ کو 1980 کے شروع سے ہی جانتے ہیں جب یہ تنظیم معرض وجود میں آئی تھی۔ اس وقت ٹیمر اقوام متحدہ کے جنوبی لبنان میں امن قائم رکھنے کے لئے سیاسی مشیر تھے۔ ٹیمر کے مطابق دلچسپ بات یہ ہے کہ ابھی تک حزب اللہ کےحامی ہی لڑتے ہوئے نظر آ رہے ہیں جبکہ وہ ابھی اپنے اصل جنگجوؤں کو سامنے لائے ہی نہیں ہیں۔

ٹیمر نے کہا کہ میرے خیال میں اسرائیل اگر اور آگے بڑھ کر ایک علاقے پر قبضہ کر لے تب حزب اللہ اپنے ماہر جنگجوؤں کو سامنے لائے گا جو اسرائیل کو کافی مہنگا پڑ سکتا ہے۔

لبنان کے شیعہ مسلمانوں کا کہنا ہے کہ حزب اللہ صرف فوجی یا سیاسی پارٹی کے طور پر ہی کام نہیں کرتی بلکہ اپنے حامیوں کو یہ سوشل سروس بھی مہیا کرتی
ہے۔

بیروت کے ایک سکول میں حزب اللہ کی بنائی ہوئی پناہ گاہ میں پندرہ سو لوگ رہائش پذیر ہیں۔ اس پناہ گاہ کو چلانے والے ایک حزب اللہ کارکن کا کہنا ہے کہ گروپ کے اپنے انجینئرز اور کارکن ہیں۔ حزب اللہ نے ایک ایسا نظام بنا رکھا ہے کہ یہ لوگوں کو ڈٹے رہنے کے لئے ہر چیز مہیا کرتا ہے۔

ایک اور خاتون کا کہنا ہے کہ حکومت کے اتنے ذرائع نہیں ہیں اس لئے حزب اللہ ہر طرح سے ہماری مدد کر رہا ہے۔ اور یوں شیعہ کمیونٹی کی نہ بدلنے والی وفاداری اس کے ساتھ ہے۔

لبنان کی مرکزی حکومت صدیوں سے کمزور چلی آرہی ہے اس لئے حزب اللہ کو یہاں سب کچھ کرنا بہت آسان ہے۔ مگر یہ بھی کہا جاتا ہے کہ حزب اللہ نے شیعہ کمیونٹی کو قابو میں کر رکھا ہے اور اپنے سکولوں، ہسپتالوں اور خواتین کی جماعتوں کےذریعے حکومت کو الگ کر رکھا ہے۔