عراق کے بگڑتے ہوئے حالات

بغداد سے بی بی سی کی نامہ نگار جین پیل کے مطابق بغداد کے لوگوں کو آمدورفت پر پابندی کی عادت ہو چکی ہے۔ ہر روز رات نو بجے سے صبح چھ بجے تک سفر کرنے پر پابندی ہوتی ہے۔ اس کے علاوہ ہر جمعے کو دن گیارہ بجے سے تین بجے تک کرفیو لاگو ہوتا ہے۔

تاہم بڑھتی ہوئی فرقہ وارانہ ہلاکتوں اور کار دھماکوں کی وجہ سے انتظامیہ نے کرفیو کے وقت میں چار گھنٹے کے اضافے کا فیصلہ کیا ہے جس کے نتیجے میں شہریوں کی آمدورفت مزید محدود ہو گئی ہے۔

جولائی میں 1000 ہلاکتیں  سرکاری اعداد کے مطابق جولائی کے مہینے میں اب تک 1000 لاشیں شہر کے لاش گھر میں لائی گئیں جن میں سے 80 فیصد تشدد کا شکار ہوئی تھیں۔

عراقی اور بین الاقوامی حکّام کا کہنا ہے کہ صورتحال کافی گھمبیر ہے تاہم بہتری کی طرف گامزن ہے۔

جمعے کو امریکن فوجوں نے بغداد سے 60 کلومیٹر شمال مغرب میں واقع بعقوبہ کے نزدیک مزاحمت کاروں پر حملے کیے۔

مقامی پولیس کا کہنا ہے کہ حملے میں چھ لوگ ہلاک ہوئے ہیں جن میں ایک عورت شامل ہے۔

لیکن امریکن فوج کے ایک ترجمان کا دعوٰی ہے کہ حملے میں القاعدہ سے منسلک ایک مشتبہ دہشت گرد ہلاک اور متعدد زخمی ہوئے ہیں۔ ترجمان کا کہنا ہے کہ جس گروہ پر حملہ کیا گیا تھا وہ علاقے میں کیے جانے والے کئی حملوں میں ملوّث تھا۔