چیک پوسٹ پر حملے میں 10 لوگ زخمی بھی ہوئے ہیں(فائل فوٹو)

حکام کے مطابق یہ واقعہ شہر کے مغربی علاقے میں منصور نامی ڈسٹرکٹ میں روسی سفارتخانے کے نزدیک پیش آیا۔

اطلاعات کے مطابق مسلح افراد نے تین کاروں کی مدد سے سڑک بلاک کی اور پھر روسی سفارتکار کی گاڑی پر فائر کھول دیا۔ روسی سفارتخانے کے ایک افسر نے سفارتکار کی ہلاکت اور دیگر سفارتکاروں کے اغوا کی تصدیق کی ہے تاہم انہوں نے حالات پر مزید تبصرہ کرنے سے انکار کر دیا۔

ادھر عراق کے شمال مشرقی شہر بعقوبہ میں ایک حفاظتی چوکی پر ہونے والے حملے میں سات عراقی پولیس اہلکار ہلاک ہوگئے ہیں۔ الرازی چیک پوائنٹ پر مزاحمت کاروں کے اس حملے میں دس افراد زخمی بھی ہوئے ہیں۔ اطلاعات کے مطابق مزاحمت کاروں نے اس حملے کے دوران راکٹوں، دستی بموں اور خودکار ہتھیاروں کا استعمال کیا۔

	سروں کو ڈبوں میں بند کر کے مردہ خانے لے جایا گیا

بعقوبہ کے دیالہ ڈسٹرکٹ میں پولیس کی حفاظتی چوکیوں پر حملے معمول بنتے جا رہے ہیں۔ ادھر خبر رساں ادارے ایسوسی ایٹڈ پریس کا کہنا ہے کہ بعقوبہ کے نزدیک ہی ایک سڑک سے آٹھ سر ملے ہیں۔ان سروں میں سے ایک کے ہمراہ ملنے والے نوٹ پر لکھا ہے کہ مرنے والا چار شیعہ ڈاکٹروں کا قاتل تھا۔

اس کے علاوہ بغداد سے بھی چار لاشیں برآمد ہوئی ہیں جن پر تشدد کے نشانات واضح ہیں۔ بغداد کے مشرقی علاقے میں ہی دو پولیس اہلکار اس وقت زخمی ہو گئے جب سڑک کے کنارے نصب بم ان کی گاڑی کے نزدیک پہنچنے پر پھٹ گیا۔

عراق میں یہ تصور کیا جا رہا ہے کہ حالیہ تشدد میں عراقی وزیرِاعظم نوری المالکی کی جانب سے داخلہ اور دفاع کے وزراء کی تقرری کے بعد ہی کمی آ سکتی ہے۔