ہاویر سولانہ نے کہا کہ ایران کو ان ترغیبات کو رد کرنا آسان نہ ہوگا

حاویئر سولانا کے مطابق اس میں پیکج اقتصادی، جوہری اور ممکنہ طور پر سکیورٹی گارنٹایاں بھی شامل ہوں گی۔

انہوں نے کہا کہ اگر ایران صرف جوہری توانائی ہی حاصل کرنا چاہتاہے تو ایران کے لیے ان نئی ترغیبات کو مسترد کردینا آسان نہ ہوگا۔

یورپی برادری کے ملکوں کے وزراء خارجہ ایران کے جوہری پروگرام پر غور کرنے کے لیے برسلز میں ایک ملاقات کر رہے ہیں۔

یورپی برادری اور امریکہ کو خدشہ ہے کہ ایران جوہری ہتھیار بنانے کی کوشش کر رہا ہے۔

ایران کا کہنا ہے کہ اس کا جوہری پروگرام پرامن مقاصد اور اس کی توانائی کی ضروریات پوری کرنے کے لیئے ہے۔

حاویئر سولانا نے ایران کے صدر احمدی نژاد کے اس بیان پر تبصرہ کرنے سے انکار کر دیا جس میں ایرانی صدر نے کہا تھا کہ ایران کس قسم کی پیش کش قبول نہیں کرئے گا اور اپنے پر امن جوہری پروگرام سے دستبردار نہیں ہوگا۔

روس اور چین دونوں ملکوں نے کہا ہے کہ وہ ایران کے خلاف کسی ایسی قرار داد کی حمایت نہیں کریں گے جو اس پر اقتصادی پابندیاں یا فوجی اقدام پر منتج ہو۔

ادھر اقوام متحدہ کے سیکریٹری جنرل کوفی عنان نے کہا ہے کہ ایران اور شمالی کوریا کے جوہری پروگرام کے بارے میں جلد ہی کوئی اقدام کرنے کی ضرورت ہے۔

کوفی عنان نے سیول میں ایک پریس کانفرنس سے خطاب کرتے ہوئے بین الاقوامی برادری کو ایران اور شمالی کوریا کے جوہری پروگرام کے بارے میں جلد اقدامات لینے پڑیں گے ورنہ اس سے جوہری پھلاؤ کو خطرہ پیدا ہو جائے گا۔