شکیل اختر بی بی سی اردو ڈاٹ کام، کٹھمنڈو

	بادشاہ کے اعلان کے بعد سینکڑوں افراد سڑکوں پر نکل آئے اور منگل کو بھی فتح کا جلوس نکالا جائے گا

اس سے پہلے سینکڑوں کی تعداد میں لوگ سڑکوں پر نکل آئے اور کئی جگہ جشن کا سا سماں دیکھا گیا۔

تاہم ماؤ نوازوں نے بادشاہ کے اعلان کو مسترد کر دیا ہے اور منگل کو ان کے اکابرین کا بھی اجلاس ہو رہا ہے۔

دارالحکومت کٹھمنڈو میں لوگوں نے سڑکوں پر ’عوامی فتح‘ کے حق میں جلوس نکالا اور جمہوریت کے لیئے پرجوش نعرے لگائے۔

نیپال میں بی بی سی کے نامہ نگار شکیل اختر نے بتایا ہے کہ شاہ گینندار کے جمعہ کو پارلیمان بلانے کے اجلاس کے بعد ملک میں خوشی کی لہر دوڑ گئی اور نصف شب تک لوگ خوشیاں مناتے رہے۔

اپوزیشن جماعتوں نے اتوار کی شام یہ کال دی تھی کہ منگل کو بادشاہ کے خلاف ایک بہت بڑا مظاہرہ ہوگا۔ اب کہا جا رہا ہے کہ لوگ منگل کو بھی سڑکوں پر آئیں گے لیکن یہ فتح کا جلوس ہوگا۔

نیپال کے بادشاہ گیانیندرا نے پیر کو ٹیلی وژن پر ملک کی پارلیمان کو بحال کرنے کا اعلان عوام کے زبردست مظاہروں کے بعد کیا۔

نیپال کی پارلیمان کو چار سال پہےتحلیل کیا گیا تھا۔ حزب اختلاف نے ملک کے آئین پر نظر ثانی کا بھی مطالبہ کیا ہے۔ جس کے مطابق بادشاہ کو حکومت اور فوج پر وسیع اختیارات حاصل ہیں۔

ہمارے نامہ نگار کا کہنا ہے کہ ماؤنوازوں اور اپوزیشن کی جماعتوں میں بادشاہ کے اعلان پر ردِ عمل مختلف ہے۔ اپوزیشن شاہی اعلان کو عوام کی بہت بڑی کامیابی قرار دے رہی ہے کیونکہ پارلیمان کی بحالی اس کے مطالبات میں سرِ فہرست اور سب سے پرزور مطالبہ تھا۔