موساوی نے وکلائے دفاع کے ساتھ تعاون کرنے سے انکار کیا تھا

استغاثہ کا مطالبہ ہے کہ موساوی کو موت کی سزا سنائی جائے۔

تاہم وکلائے دفاع کا کہنا ہے کہ موساوی کو عمر قید کی سزائے ہی ہونی چاہیے کیونکہ بقول ان کے موساوی کو اگر جیل میں رکھا جائے تو یہ انہیں آہستہ آہستہ موت کے گھاٹ اتارنے کے مترادف ہوگا جبکہ سزائے موت پانے سے انہیں شہادت کا درجہ ملے گا۔

زکریا موساوی وہ واحد شخص ہیں جن پر امریکہ میں گیارہ ستمبر کے حملوں کے سلسلے میں مقدمہ چلایا گیا ہو۔

اس مقمدے میں چھ ہفتے تک شہداتیں سنی گئی ہیں۔ جیوری اپنا فیصلہ جج کو دے گی اور جج اسے عدالت میں سنائیں گی۔

موساوی کی والدہ نے کہا ہے کہ وہ فیصلہ سننے کے لیے فرانس سے امریکہ آئیں گی۔

موساوی نے وکلاء دفاع کے ساتھ تعاون کرنے سے انکار کیا تھا۔ انہوں نے عدالت میں یہ بھی کہا تھا کہ انہیں کوئی افسوس نہیں ہے اور بقول ان کے ’کاش روز گیارہ ستمبر ہو سکتا‘۔

وکلائے دفاع نے 37 سالہ موساوی کو ایک ذہنی مریض ثابت کرنے کی کوشش کی ہے۔

ادھر استغاثہ کا کیس یہ رہا ہے کہ موساوی کے پاس ایسی معلومات تھیں جن سے گیارہ ستمبر کے حملے روکے جا سکتے۔ ان کا کہنا ہے کہ اگر حکام کو یہ معلومات دی جاتی تو وہ حملے روکے جا سکتے تھے جن میں تین ہزار کے قریب لوگ ہلاک ہوئے۔

موساوی کو اگست سنہ دو ہزار ایک میں امریکی ریاست منیسوٹا سے گرفتار کیا گیا تھا۔ مقدمے کے دوران انہوں نے بتایا کہ وہ گیارہ ستمبر کو مقید برطانوی ’شو بامبر‘ رِچرڈ ریڈ کی مدد سے وائٹ ہاؤس پر طیارے سے حملہ کرنے والے تھے۔

تاہم وکلائے دفاع نے عدالت میں ایف بی آئی کے وہ شواہد پیش کیے جس میں تفتیش کاروں نے کہا تھا کہ یہ انتہائی نا ممکن ہے کہ موساوی اور رچرڈ ریڈ کا کوئی تعاون رہا ہو۔