پاکستانی فوجی حکومت کے ہاتھوں جلاوطن ہونے والے ان دونوں رہنماؤں کے درمیان اس سے قبل دبئی اور سعودی عرب میں بھی ملاقاتیں ہو چکی ہیں

لندن میں پاکستان سابق وزرائے اعظم نواز شریف اور بے نظیر بھٹو کے درمیان ملاقات ختم ہو چکی ہے اور اس ملاقات کے بعد صحافیوں سے بات کرتے ہوئے دونوں رہنماؤں نے بتایا کہ وہ چودہ مئی کو ایک اور ملاقات کریں گے۔

چارٹر آف ڈیموکریسی پر گفتگو

دونوں نے اس ملاقات کو تاریحی قرار دیتے ہوئے کہا کہ انہوں نے پاکستان میں جمہوریت واپس لانے پر اصولی اتفاق کر لیا ہے۔

پاکستان کے سابق وزرائے اعظم کے درمیان یہ ملاقات دوگھنٹے تک جاری رہی۔

پاکستان کے جلاوطن وزرائے اعظم کے درمیان یہ ملاقات لندن کے علاقے پارک لین میں واقع میاں نواز شریف کی رہائش گاہ پر ہوئی اور اس میں پاکستان پیپلز پارٹی کی سربراہ بےنظیر بھٹو کے علاوہ پی پی پی کے رہنما مخدوم امین فہیم، واجد شمس الحسن اور ڈاکٹر رحمٰن ملک بھی شامل ہوئے۔

جب کہ مسلم لیگ کی طرف سے میاں محمد نواز شریف اور میاں شہباز شریف کے علاوہ اقبال ظفر جھگڑا اور سید غوث علی شاہ اس ملاقات میں شریکت کی۔

پاکستانی فوجی حکومت کے ہاتھوں جلاوطن ہونے والے ان دونوں رہنماؤں کے درمیان اس سے قبل دبئی اور سعودی عرب میں بھی ملاقاتیں ہو چکی ہیں۔

اس ملاقات سے قبل میاں نواز شریف کے بھائی میاں شہباز شریف نے بی بی سی سے گفتگو کرتے ہوئے کہا تھا کہ ملاقات کے دوران ملاقات کے دوارن ’چارٹر آف ڈیموکریسی‘ کو آخری شکل دینے پر خیال کیا جائے گا اور یہ بات طے کی جائے گی کہ کہ اے آر ڈی میں شریک سیاسی جماعتیں آئندہ سیاسی عمل میں فوج کو مداخلت کی دعوت دینے سے احتراز کرنے کا وعدہ کریں گی۔