انڈونیشیا میں بحری حادثات معمول کا حصہ ہیں

ایک قریبی شہر کوپنگ کی مقامی پولیس کا کہنا ہے کہ امدادی ٹیموں نے انہیں بتایا ہے کہ کشتی پر 60 افراد سوار تھے۔ ابتدا میں اندازہ لگایا گیا تھا کہ یہ تعداد سو کے قریب ہے۔

کشتی خراب موسم میں روٹ جزیرے کی طرف رواں دواں تھی۔ یہ علاقہ دارالحکومت جکارتہ سے دو ہزار کلو میٹر مشرق میں واقع ہے۔ کشتی کے کپتان کا کہنا ہے کہ کشتی ڈوبنے کے وقت اس پر 54 مسافر اور چھ عملے کے افراد سوار تھے۔

بندرگاہ کے ایک اہلکار نےبتایا ہے کہ منگل کی دوپہر تک 59 افراد یا تو تیر کر یا پھر امدادی ٹیموں کے ذریعے صحیح سلامت کنارے تک پہنچ گئے ہیں۔ پولیس کے مطابق 19 افراد کو ہسپتال پہنچا دیا گیا ہے۔

انڈونشیا میں بحری حادثات معمول کا حصہ ہیں جہاں دو جزیروں کے درمیان نقل و حمل کا بڑا ذریعہ محض کشتیاں ہی ہیں۔ فروری میں اسی مقام پر ایک کشتی ڈوبنے سے چالیس افراد ہلاک ہوگئے تھے۔