عراق میں فرقہ وارانہ تشدد میں اضافہ ہوا ہے

مسجدِ براثہ میں نمازِ جمعہ کی ادائیگی کے بعد باہر نکلنے والے افراد پر ہوئے ان حملوں میں کم از کم ایک سو ساٹھ افراد زخمی بھی ہوئے ہیں۔

پولیس کے مطابق دو خودکش حملہ آوروں نے زنانہ کپڑے پہن رکھے تھے۔

مسجدِ براثہ میں ہونے والے ان دھماکوں کے بارے میں ابتداء میں ابہام پایا جا رہا تھا۔ پہلے کہا گیا کہ مسجد پر مارٹر حملہ کیا گیا ہے لیکن اس کے بعد پولیس نے کہا کہ یہ تین خودکش دھماکے تھے۔

دھماکے کے بعد امدادی کارکنوں نے ریڑھیوں پر لاشوں اور زخمیوں کو جائے حادثہ سے منتقل کیا۔ جبکہ بغداد کی سٹی کونسل کی جانب سے خون کے عطیے کی بھی اپیل کی گئی۔

بی بی سی کے نمائندوں کا کہنا ہے کہ یہ دھماکے عراق کی وزارتِ داخلہ کی جانب سے اس تنبیہ کے بعد ہوئے ہیں جس میں کہا گیا تھا جمعہ کو بغداد کی کسی مسجد پر حملہ ہو سکتا ہے۔ وارننگ میں کہا گیا تھا کہ اطلاعات ہیں کہ مزاحمت کار شہر میں سات بم دھماکے کرنے کا ارادہ رکھتے ہیں۔

یاد رہے کہ گزشتہ روز ہی شیعوں کے مقدس عراقی شہر نجف میں ایک کار بم حملے میں دس افراد ہلاک ہوئے تھے جبکہ عراق میں امریکہ کے سفیر زلمے خلیل زاد نے کہا ہے کہ امریکی حکام نے عراق میں سنی مزاحمت کاروں کے کچھ گروہوں سے ملاقات کی ہے۔

انہوں نے بی بی سی کو بتایا ہے کہ ان کے خیال میں اس بات چیت کا اثر ہوا ہے کیونکہ امریکی فوجیوں پر حملوں میں کمی واقع ہوئی ہے۔