طلباء کہتے ہیں کہ متنازع قانون ملازمتوں میں اسحتکام کو ختم کر دے گا

درجنوں طلباء نے کھڑکیوں کے شیشے توڑ دیئے، دوکانوں کو لوٹ لیا، گاڑیوں کو نذرِ آتش کر دیا اور پولیس پر پتھر برسائے۔ پولیس کا کہنا ہے کہ پرتشدد مظاہروں کے دوران چار سو کے قریب مظاہرین کو گرفتار کر لیا گیا ہے۔

تاہم مظاہرین کی اکثریت کے بارے میں بتایا گیا ہے کہ وہ پرامن رہی۔

یونین کے رہنماؤں نے کہا ہے کہ انہوں نے وزیرِ اعظم ڈی ویلیپاں سے بات چیت پر اتفاق کیا ہے اور یہ ملاقات جمعہ کو ہوگی جس میں نئے تنازعے پر مذاکرات کیئے جائیں گے۔ یونین چاہتی ہے کہ حکومت نیا متنازع قانون ختم کر دے۔

یونین نے یہ بھی کہا ہے کہ وہ اس وقت تک مذاکرات نہیں کرے گی جب تک فرسٹ ایمپلائمنٹ کنٹریکٹ واپس نہیں لیا جاتا۔ یونین کے رہنماؤں نے یہ بھی کہا ہے کہ وزیرِ اعظم کے ساتھ ملاقات میں صرف اور صرف مطالبات کے حق میں بات کی جائے گی۔

فرانسیسی وزیرِ اعظم نے کہا ہے کہ وہ یونین رہنماؤں کے ساتھ ملاقات میں قانون میں ترمیم کی بات کریں گے لیکن اسے واپس نہیں لیں گے۔

منگل کو اس قانون کے خلاف فرانس میں ہڑتال بھی بلائی گئی ہے۔

قانون کے خلاف احتجاج مظاہروں کی شکل میں پورے فرانس میں پھیل گیا ہے اور اکثر مظاہرے تشدد پر منتہج ہوئے ہیں۔

	وزیرِ اعظم ڈی ویلیپاں قانون واپس لینے پر تیار نہیں البتہ اس میں ترمیم کا عندیہ دے رہے ہیں

کئی مظاہرین نے یہ کوشش بھی کی کہ وہ اس گروپ سے الگ رہیں جو تشدد پر اترا ہوا ہے۔

مظاہروں میں شریک ایک بائیس سالہ نوجوان چارلی ہربلن نے خبررساں ادارے رائٹرز کو بتایا کہ اس مرتبہ کئی مجرم بھی مظاہروں کی آڑ میں چوری چکاری اور توڑ پھوڑ کر رہے ہیں اور اس وجہ سے تحریک کا نام بدنام ہو رہا ہے۔

فرانس کے مشرقی شہر سٹراسبرگ میں مظاہرین نے ایمپلائرز فیڈریشن کے علاقائی دفتر کے باہر دھرنا دیا۔

نامہ نگاروں کا کہنا ہے کہ فرانسیسی وزیرِ اعظم پر صدر ژاک شیراک کا دباؤ بڑھتا جا رہا ہے کہ وہ متنازع قانون پر مذاکرات کا دروازہ کھولیں لیکن اس سے خود مسٹر ڈی ویلیپاں کی صدر بننے کی کوششوں اور امیدوں کو زک پہنچے گی۔

ان کی حکومت نے گزشتہ برس فرانس کے نواحی علاقوں میں نوجوانوں کی مدد کے لیئے جن مختلف اقدامات کا فیصلہ کیا تھا موجود متنازع قانون انہی کا حصہ ہے۔

اس قانون کے تحت آجروں کو چھبیس سال سے کم عمر ملازموں کی نوکری کسی بھی وقت ختم کرنے کا اختیار مل رہا ہے اور اس کے لیئے انہیں نہ کوئی وضاحت دینی پڑے گی اور نہ پیشگی وارننگ۔

حکومت کہتی ہے کہ اس قانون کی مدد سے آجر نوجوانوں کو ملازم رکھ سکیں گے لیکن طلبا کہتے ہیں کہ اس سے فرانس میں ملازمتوں میں اسحتکام ختم ہو جائے گا جہاں پہلے ہی اٹھارہ سے پچیس برس کی عمر کے بیس فیصد افراد بے روزگار ہیں۔