عراق میں ان دنوں حملے بڑھتے جا رہے ہیں

پولیس حکام نےخبر رساں ادارے رائٹرز کو بتایا کہ اتوار کی صبح بغداد کے جنوب میں ریلوے لائن کے قریب واقع سٹرک پر نصب بم پھٹنے سے چھ افراد ہلاک اور چودہ زخمی ہو گئے۔

پولیس کےمطابق حملے کا نشانہ امریکی فوجیوں پر مشتمل گشت پر معمور دستہ تھا۔ مرنے والوں میں پولیس اہلکار بھی شامل ہیں۔

بغداد کے مرکزی حصے میں ایک اور بم حملے میں دو عراقی فوجی ہلاک اور چار زخمی ہو گئے ہیں۔

اس سے قبل مشرقی حصے میں واقع مستنصیریہ سکوائر میں عراقی فوجیوں کو نشانہ بنانے کے لیے سڑک پر نصب ایک بم حملے میں پانچ فوجی زخمی ہو گئے۔

مرکزی بغداد میں ہی رنگ و روغن کے سامان کی ایک دوکان پر مارٹر حملے میں دو شہری زخمی ہو گئے جبکہ بغداد کے جمالیہ علاقے میں ایک مکان پر مارٹر بم حملے میں دو افراد زخمی بتائے جاتے ہیں۔

حملوں کا تازہ سلسلہ سابق عراقی صدر صدام حسین کے مقدمے کی کارروائی کے آغاز سے چند گھنٹے قبل شروع ہوا ہے۔

صدام اور ان کے سات ساتھیوں پر دجیل میں 148 شیعہ افراد کو قتل کرنے کا مقدمہ چلایا جا رہا ہے۔ یہ افراد صدام پر قاتلانہ حملہ کرنے کے جرم میں قتل کیے گئے۔