یہ کارٹون ملک میں ڈنمارک کے خلاف جاری مہم میں تیزی پیدا کرنے لیے شائع کیے گئے

’شمس‘ نامی اس اخبار کی اشاعت ان کارٹونوں کی اشاعت کے معاملے سے متعلق تحقیقات کے لیے روکی گئی ہے۔ تین ہفتے قبل اس اخبار نے عرب دنیا کے چند دیگر اخبارات کے ہمراہ متنازعہ کارٹون شائع کیے تھے۔

کارٹون تنازعہ: خصوصی ضمیمہ

’شمس‘ میں یہ کارٹون ایک مضمون کے ہمراہ شائع کیے گئے تھے جس میں سعودی عوام سے کہا گیا تھا کہ وہ ڈنمارک کے خلاف کارروائی کریں۔ سعودی نوجوان نسل کے اس اخبار کا کہنا ہے کہ اس نے یہ کارٹون ملک میں ڈنمارک کے خلاف جاری مہم میں تیزی پیدا کرنے لیے شائع کیے۔

تاہم اخبار کا مقصد جو بھی ہو سعودی حکام ان کارٹونوں کی اشاعت سے خوش نہیں ہیں۔ اطلاعات کے مطابق سعودی وزارتِ ثقافت اس بات کی چھان بین کر ہی ہے کہ اس اخبار نے یہ کارٹون شائع کرنے کا فیصلہ کیوں کیا اور اسی سلسلے میں اخبار کی اشاعت معطل کی گئی ہے۔

اخبار کے مالکان نے بی بی سی کے رابطہ کرنے پر اس بات کی تصدیق نہیں کی تاہم اخبار پیر کو شائع نہیں ہوا۔ شمس نامی یہ اخبار صرف دو ماہ قبل ہی شائع ہونا شروع ہوا ہے اور سعودی عرب میں یہ اپنی نوعیت کا واحد اخبار ہے جو کہ نوجوان نسل کے لیے شائع ہوتا ہے۔

اس اخبار میں سعودی عرب میں خواتین کے کردار اور اس جیسے متعدد متنازع موضوعات پر کالم اور خبریں شائع ہوتی رہی ہیں اور اطلاعات کے مطابق اس اخبار میں شائع ہونے والے کچھ مضامین میں سعودی حکمرانوں کے قدامت پسند نظریات کی مخالفت کی وجہ سے پہلے بھی تنازعہ پیدا ہو چکا ہے۔