ایمنسٹی انٹرنیشنل نے ان ہلاکتوں کی تحقیقات کا مطالبہ کیا ہے

افغانستان اور عراق میں امریکی تحویل میں مرنے والے قیدیوں کے یہ اعدادوشمار انسانی حقوق کی تنظیم ’ ہیومن رائٹس فرسٹ‘ نے جاری کیے ہیں۔

ان اعدادوشمار کے مطابق امریکی قید میں ہلاک ہونے والے اٹھانوے قیدیوں میں سے چونتیس کے بارے میں شبہہ ہے یا ان کی تصدیق ہوچکی ہے کہ انہیں قتل کیا گیا۔

امریکی وزارتِ دفاع پینٹاگن نے نیوز نائٹ میں بتایا کہ انہوں نے ایسی کوئی رپورٹ نہیں دیکھی ہے البتہ انہوں نے ان الزامات کو بڑی سنجیدگی سے لیا اور کہا کہ اگریہ سچ ثابت ہوا تو قتل میں ملوث فوجیوں پر مقدمات چلائے جائیں گے۔

رپورٹ میں وضاحت کی گئی کہ ان چونتیس افراد کا قتل یا تو دانستہ طور پر کیا گیا یا یہ لاپرواہی کے نتیجے میں ہوئے۔

انہوں نے کہا کہ اس کے باوجود ایسے بہت کم کیسوں میں مقدمات چلائے گئے ہیں اور بہت معمولی سزائیں سنائی گئی ہیں۔

برطانوی رکنِ پارلیمنٹ باب مارشل اینڈریو نے پریس ایسوسی ایشن کو بتایا کہ رپورٹ نے اعداد وشمار کے ذریعے ان شواہد کی تصدیق کی ہے جن کی ویڈیو ریکارڈنگ پہلے سے موجود ہے

انہوں نے کہا کہ یہ بالکل سوچے سمجھے انداز میں قتل ہوئے ہیں اور ان کی ذمہ داری امریکہ اور برطانوی دونوں ملکوں کے اعلی حکام تک جانی چاہیے۔

انسانی حقوق کی عالمی تنظیم ایمنسٹی انٹرنیشنل نے اس ضمن میں پوری تفتیش کرانے کا مطالبہ کیا۔

ایمنسٹی انٹرنیشنل کے ترجمان نے کہا کہ دہشت گردی کے خلاف جنگ میں اتحادی فوج کی تحویل میں ہونے والی ہلاکتیں ایک قابلے تشویش امر ہے اور اتحادی اور امریکی فوجی حکام کو چاہیے ان واقعات کی آزادانہ تفتش کرنے کی اجازت دیں۔

انہوں نے کہا کہ ان کی تنظیم نے اس قسم کے واقعات سے نرمی برتنے کا معاملہ بھی اٹھایا ہے۔