آرنلڈ اپنے بیٹے کے ہمراہ موٹر سائیکل پر سفر کر رہے تھے

کیلیفورنیا کے گورنر کے ترجمان نے بتایا کہ شوازنیگر اپنے بیٹے کے ساتھ موٹر سائیکل پر جا رہے تھے کہ ان کے آگے جانے والی ایک کار اچانک پیچھے مڑنا شروع ہوگئی۔

ترجمان کے مطابق یہ واقعہ اتنا اچانک ہوا کہ گورنر اپنے موٹر سائیکل کو واپس مڑتی ہوئی گاڑی سے بچا نہ سکے اور گاڑی اور موٹر سائیکل میں تصادم ہوگیا۔

شوازنیگر کو منہ پر چوٹیں آئیں اور ان کے ہونٹ پر جہاں زیادہ چوٹ لگی تھی پندرہ ٹانکے لگے ہیں۔ تاہم گورنر شوازنیگر اپنی سرکاری مصروفیات جاری رکھیں گے۔

گورنر کی ترجمان نے بتایا کہ ٹرمینیٹر فلم کے سٹار اور ان کے صاحبزادے دونوں نے ہیلمٹ پہنچ رکھے تھے جب یہ ’چھوٹا سا حادثہ‘ ہوا۔

شوازنیگر کے بیٹے پیٹرک شوازنیگر جن کی عمر بارہ برس ہے کو بھی ہسپتال لے جایا گیا اور ان کی مرہم پٹی کی گئی۔

آسٹریا میں پیدا ہونے والے شوازنیگر جو باڈی بلڈنگ یعنی جسم سازی کے لیے بھی کافی مشہور ہیں، دو ہزار تین میں کیلیفورنیا کے گورنر منتخب ہوئے تھے۔ ان نے اس بات کی تصدیق کی ہے کہ وہ اگلے برس اس منصب کے لیے دوبارہ امیدوار ہوں گے۔

سن دو ہزار ایک میں شوازنیگر کی موٹر سائیکل سامنے والی ایک گاڑی سے ٹکرا گئی تھی اور اس حادثے کے نتیجے میں ان کی چھ پسلیاں ٹوٹ گئیں تھیں جس کے نتیجے میں انہیں چار دن ہسپتال میں رہنا پڑا تھا۔