یہ صفحہ دوست کو ای میل کیجیئے		پرِنٹ کریں

امریکہ میں عوامی نمائندگی کرنے والوں کا اخلاقی محاسبہ عوام کرتی ہے۔

امریکی ریاست کیلیفورنیا میں گورنر کا انتخاب لڑنے والے، ایکشن فلموں کے معروف ہیرو، آرنلڈ شوارزنیگر پر مزید کئی عورتوں نے الزام لگایا ہے کہ وہ بُری نیّت سے خواتین پر حاوی ہونے کی کوشش کرتے رہے ہیں۔

قبل ازیں گورنری کے امّید وار ایکشن ہیرو سرِ عام یہ اعتراف کر چکے ہیں کہ ماضی میں وہ عورتوں کے سلسلے میں جنسی دست درازی کا مظاہرہ کرتے رہے تھے لیکن اپنے اس سابقہ رویّے پر انہوں نے متّاثرہ خواتین سے معذرت طلب کرتے ہوئے کہا تھا: ’اگر میری چھیڑ چھاڑ واقعی ناگوار گزری تھی تو مجھے اسی وقت منع کر دیا ہوتا۔‘

اداکار کے خلاف جن چھ خواتین کے بیانات شائع ہوئے تھے ان میں سے ایک کا کہنا تھا کہ 25 برس پہلے جب وہ اداکار شوارزنیگرکو اپنے سٹوڈیو کی سیر کرا رہی تھی تو انھوں نے موقعہ پاتے ہی انہیں دبوچ لیا تھا۔

ریڈیو پر پروگرام پیش کرنے والی ایک خاتون کا دعویٰ تھا کہ ایک بار جب وہ انکا انٹرویو کر رہی تھی تو میز کے نیچے وہ ان کی ٹانگوں پر ہاتھ پھیرتے جا رہے تھے۔

کیلی فورنیا میں گورنر کے لئے انتخاب منگل کے دن منعقد ہوگا۔ انتخابی مہم کے دوران ریاست کے عوام نے بڑے جوش و خروش سے آرنلڈ شوارزنیگر کے جلسوں میں شرکت کی ہے اور موجودہ الزامات سے قبل شائع ہونے والے رائے عامہ کے جائزوں کے مطابق وہ اس انتخابی دوڑ میں اپنے مخالفین سے بہت آگے ہیں۔