اس کے علاوہ روزانہ بارہ سو پاؤنڈ منافع کا بھی نقصان ہو گا

لاٹری کا یہ ٹکٹ ڈونکاسٹر سے خریدا گیا تھا۔ گزشتہ سال چھ جولائی کو ہونے والی قرعہ اندازی کے بعد اب تک اس انعام میں منافع کی مد میں ایک لاکھ بیس ہزار پاؤنڈ کا اضافہ ہو چکا ہے۔

انعام جیتنے والے نمبر اس طرح ہیں: 3، 12، 17، 36، 44، اور 49۔

اگر اس انعام کے کلیم کو پیر کے روز شام ساڑھے پانچ بجے تک نہ داخل کیا گیا تو انعام لاٹری کے فلاحی کا موں کے فنڈ میں چلا جائے گا۔

کیم لوٹ کمپنی کی کیتھرین ولیم سن کا کہنا ہے کہ ’زیادہ تر لوگ اپنے ٹکٹ کا نمبر دیکھتے ہیں۔ اب تک صرف چھ بڑے انعامات ایسے گزرے ہیں جن کا کوئی دعوے دار سامنے نہیں آیا ورنہ زیادہ تر لوگ انعام لے لیتے ہیں‘۔

جن انعامات کا کوئی دعوے دار سامنے نہیں آیا ہے ان میں سے رقم کے لحاظ سے یہ سب سے بڑا انعام ہے۔ اس سے پہلے اس نوعیت کے انعام کی سب سے بڑی رقم ستر لاکھ پاؤنڈ تھی۔

ستر لاکھ پاؤنڈ کے انعام کا ٹکٹ اگست دو ہزار چار میں بیلفاسٹ سے خریدا گیا تھا لیکن اس کا خریدار کبھی سامنے نہیں آیا۔ جیتنے والے خوش نصیب کے لیے انعام کا کلیم داخل کرنے کے لیے ایک سو اسی دن کی معیاد مقرر ہے۔