خدشہ ہے کہ پیر کے دن یہ طوفان امریکی ریاست فلوریڈا سے ٹکرائے گا

مقامی گورنر نے بتایا ہے کہ دو سو پچیس کلومیٹر فی گھنٹہ کی رفتار سے چلنے والی ہواؤں نے ان عمارتوں کو بھی نقصان پہنچایا ہے جو طوفان سے محفوظ تصور کی جاتی تھیں۔

ان کا کہنا تھا کہ طوفان کے کم رفتار سے آگے بڑھنے کی وجہ سے زیادہ تباہی ہو رہی ہے اور علاقے میں عمارتوں کی کھڑکیاں ٹوٹ گئی ہیں، گھروں کی چھتیں اور درخت اکھڑ گئے ہیں اور شہر کی گلیاں اور سڑکیں زیرِ آب آگئی ہیں۔

انہوں نے کہا کہ ’ ولما کی آنکھ (مرکزی حصہ) بہت بڑی ہے اور اس مطلب ہے کہ طوفان کے دوران سات سے آٹھ گھنٹے تک سکون ہو گا اور لوگوں کا خیال ہو گا کہ طوفان گزر گیا مگر ایسا ہو گا نہیں‘۔

ولما طوفان کا مرکزی حصہ اب کنکن کے علاقے کی جانب بڑھ رہا ہے اور خدشہ ہے کہ پیر کے دن یہ طوفان امریکی ریاست فلوریڈا سے ٹکرائے گا۔ کیوبا میں بھی تین لاکھ ستّر ہزارافراد کو طوفان کے راستے سے ہٹ کر محفوظ مقامات پر چلے جانے کا حکم دے دیا گیا ہے۔

فلوریڈا کےگورنر جیب بش نے ریاست میں ایمرجنسی نافذ کردی ہے اگرچہ لوگوں کو محفوظ مقامات پر پہنچانے کے کام میں تاخیر کی جا رہی ہے کیونکہ اندازہ ہے کہ اپنی کم رفتار کی وجہ سےولما طوفان پیر سے قبل فلوریڈا نہیں پہنچ سکے گا۔

سنہ 2005 سمندری طوفانوں کے حساب سے سب سے تباہ کن سال رہا ہے۔ ولما اس سال کا بارہواں طوفان ہے اور اس سے قبل 1851 میں طوفانوں کا ریکارڈ رکھے جانے کے آغاز سے لے کر اب تک صرف 1969 میں ہی بارہ سمندری طوفان آئے تھے۔

ایک حساب سے ولما تاریخ کا سب سے طاقتور ترین طوفان ہے اور اس طوفان کے دوران بحرِ اوقیانوس میں سب سے کم بیرومٹیک دباؤ ریکارڈ کیا گیا ہے۔ اس طوفان کی شدت اگرچہ درجہ پانچ سے کم ہو کر درجہ چار ہو چکی ہے تاہم ماہرین کا کہنا ہے کہ اس کی شدت میں دوبارہ اضافہ بھی ہو سکتا ہے۔