 | | | انجینئر کہہ رہے ہیں کہ پانی توقعات سے زیادہ تیزی سے بڑھ رہا ہے |
حال ہی میں سمندری طوفان کترینا کا شکار ہوئے شہر نیو آرلینز کو ایک بار پھر پانی سے خطرہ ہے۔ سمندری طوفان ریٹا کی وجہ سے پانی شہر کے ارد گرد بنائے ہوئے بند سے باہر نکل رہا ہے اور خطرہ ہے کہ شہر میں ایک مرتبہ پھر سیلاب آ جائے گا۔ فوج کے انجینئروں نے خبردار کیا ہے کترینا کے بعد بنائے گئے بند صرف پندرہ سینٹی میٹر پانی برداشت کر سکتے ہیں۔ لیکن شہر میں کئی کئی جگہ تیس فٹ بڑی پانی کی لہر کی بھی اطلاع ہے۔ اس وقت امریکہ کی تاریخ کا سب سے بڑا انخلاء ہو رہا ہے اور تقریباً بیس لاکھ افراد ساحلی شہر چھوڑ کر جا رہے ہیں۔ دریں اثناء امریکی حکام کا کہنا ہے کہ سمندری طوفان ریٹا کے خطرے کے پیشِ نظر ہیو سٹن سے منتقل کیے جانے والے افراد کی بس میں آگ لگنے سے کم از کم چوبیس مسافر زندہ جل گئے ہیں۔ یہ واقعہ ڈیلاس کے شمال میں انٹر سٹیٹ پنتالیس نمبر ہائی وے پر پیش آیا۔ حادثے کے وقت سڑک پر گاڑیوں کی لمبی قطاریں موجود تھیں۔ پولیس کے ترجمان نے خبر رساں ادارے اے پی کو بتایا کہ بس میں سوار مسافر آکسیجن استعمال کر ہے تھے جس کی وجہ سے آگ زیادہ تیزی سے بھڑکی۔ اس سے قبل کہا گیا تھا کہ یہ آگ تکنیکی خرابی کی وجہ سے لگی۔ ترجمان نے کہا کہ ’ پولیس اہلکار تمام مسافروں کو بس سے نکالنے میں ناکام رہے‘۔ اطلاعات کے مطابق اس بس میں 45 مسافر سوار تھے۔ بس کے تمام مسافروں کو بیل ائر میں واقع ایک نرسنگ ہوم سے نکالا گیا تھا۔ پولیس کے ترجمان کا کہنا ہے کہ بس پر موجود آکسیجن سلنڈروں کے پھٹنے کی وجہ سے دھماکے بھی ہوئے۔ بس کے حادثے کے بعد ہائی وے کی ساتھ والی لین بند کر دی گئیں جس کی وجہ سے ٹریفک جام ہو گیا اور سو کلومیٹر تک گاڑیوں کی قطاریں لگ گئیں۔
| 
یہ صفحہ دوست کو ای میل کیجیئے
پرِنٹ کریں
