’حملوں کی تفتیش سست رفتار اور دھیان سے کیا جانے والا کام ہے جو انتہائی مشکل صورتحال میں جاری ہے‘

سکاٹ لینڈ یارڈ کے ڈپٹی اسسٹنٹ کمشنر برائن پیڈک نے ایک اخباری کانفرنس سے خطاب کرتے ہوئے کہا کہ تینوں دھماکے پچاس سیکنڈ کے اندر اندر ہوئے۔

زیر زمین ریلوے سے حاصل ہونے والی معلومات سے وہ ابتدائی اندازے غلط ثابت ہو گئے جن کے مطابق دھماکے مختلف اوقات میں ہوئے تھے۔

پولیس نے کہا کہ دھماکوں کا شکار ہونے والوں کی تلاش رات بھر جاری رہے گی۔ پولیس نے کہا کہ ابھی تک یقین سے نہیں کہا جا سکتا کہ کنگز کراس سٹیشن کے نیچے ریلوے سرنگ میں کتنے افراد کی لاشیں پھنسی ہوئی ہیں۔

پولیس کے ڈپٹی چیف کانسٹیبل اینڈی ٹراٹر نے کہا کہ ’یہ سست رفتار اور دھیان سے کیا جانے والا کام ہے جو انتہائی مشکل صورتحال میں مکمل ہوگا‘۔

بم دھماکوں میں انچاس افراد کی ہلاکت کی تصدیق ہو چکی ہے۔ پچیس افراد لاپتہ ہیں جن کے بارے میں تشویش کا اظہار کیا جا رہا ہے۔

پولیس نے کہا کہ دھماکے آٹھ بج کر پچاس منٹ پر ہوئے اور شواہد کی روشنی میں خیال ہے کہ یہ ٹائم بم سے کیے گئے۔

برائن پیڈک نے ان اطلاعات کی تردید کہ پولیس کسی ’مخصوص شخص‘ کی تلاش کر رہی ہے۔

برطانیہ کہ وزیر اعظم ٹونی بلیئر نے کہا ہے کہ صرف حفاظتی انتظامات کی مدد سے دہشت گردی کا مقابلہ نہیں کیا جا سکتا بلکہ اس کو جڑ سے ختم کرنے کے لیے نظریاتی جدو جہد کی ضرورت ہے۔

دریں اثناء پولیس حملہ آوروں کی تلاش میں اتنے بڑے پیمانے پر خفیہ کیمروں سے حاصل کی گئی تصاویر کا معائنہ کر رہی ہے جس کے ملک کی تاریخ میں کم ہی مثال ملتی ہے۔

دھماکوں کا سراغ لگانے کے لیے لندن پولیس نے فورنسک اور انٹیلیجنس شہادتیں اکھٹی کرنی شروع کر دی ہیں۔

برطانیہ نے دہشت گردی کا نشانہ بننے والے یورپی ملک ہسپانیہ سے بھی مدد حاصل کر لی ہے اور ہسپانیہ کے دہشت گردی کے ماہرین کی ایک ٹیم لندن پہنچ رہی ہے۔