 |  دھماکے کا شکار ہونے والا ریستوران عراقی اور امریکی فوجیوں میں مقبول تھا۔ |
بغداد کے گرین زون کے علاقے میں ایک ریستوران میں ایک بظاہر خود کش حملے میں کم از کم تئیس افراد ہلاک ہو گئے ہیں۔ پولیس کے ذرائع کے مطابق ہلاک ہونے والوں میں پولیس کے چھ اہلکار بھی شامل ہیں۔ دھماکے میں کم از کم پندرہ افراد کے زخمی ہونے کی بھی اطلاع ہے۔ خود کش حملہ اس وقت ریستوران میں داخل ہوا جب وہاں پر موجود لوگ دن کا کھانا کھا رہے تھے۔ یہ حملہ اس وقت ہوا ہے جب امریکی قیادت میں فوجیں شام کی سرحد کے قریب ایک بڑی کارروائی میں مصروف ہیں۔ اپریل سے شروع ہونے والی اس کارروائی میں اب تک ایک ہزار افراد ہلاک ہو چکے ہیں جن میں زیادہ ترتعداد عراقی باشندوں کی ہے۔ ریستوران میں دھماکہ اس بات کے باوجود ہوا ہے کہ تقریباً ایک ہزار امریکی اور عراقی فوجی اس وقت بغداد کے شمال مغربی حصے میں سکیورٹی کو یقینی بنانے ایک آپریشن میں مصروف ہیں۔ دوسری جانب عراق کے مختلف علاقوں میں شدت پسندوں نے بھی اپنی کارروائیاں تیز تر کر دی ہیں۔ بغداد میں ہی ایک کاربم دھماکے میں دو افراد ہلاک ہو گئے ہیں جبکہ ملک کے شمالی شہر کرکک میں بھی ایک کار بم کے دھماکے میں تین افراد ہلاک ہوئے ہیں۔ خود کش حملہ آور مقامی وقت کے مطابق دو بجکر پینتالیس منٹ پر ریستوران میں داخل ہوا اوراس نے کئی پولیس اور سکیورٹی اہلکاروں کو ہلاک کر دیا۔ بغداد کے سرکاری عمارتوں کے علاقےگرین زون کے گیٹ سےصرف چار سوگز دور،ایک پولیس چوکی کے قریب واقع یہ ریستوران عراقی اور امریکی فوجیوں میں مقبول ہے۔ | 
یہ صفحہ دوست کو ای میل کیجیئے
پرِنٹ کریں
