مقتدیٰ الصدر کے حامی روضہ حضرت علی میں مبینہ طور مورچہ بند ہیں

مظاہرین کی بڑی تعداد نے بینر اٹھا رکھے تھے جن پر امریکہ مخالف نعرے درج تھے۔ فردوس سکوائر میں ہونے والے مظاہرے میں وہ افراد بھی شامل تھے جو عراق پر امریکی قبضے کے خلاف احتجاجاً جمعہ کی رات سے اس جگہ پرموجود تھے۔

اس پرامن مظاہرے میں امریکی فوجیوں سے عراق چھوڑنے کے علاوہ صدام حسین اور ان کے ساتھیوں پر جلد مقدمہ چلانے کا بھی مطالبہ کیا گیا۔

اس کے علاوہ ایسوسی ایشن آف مسلم سکالرز کے سنی علماء نے عراق کے سنّی عوام سے اپیل کی تھی کہ وہ بھی شیعہ رہنما مقتدی الصدر کی اپیل پر ہونے والے مظاہرے میں شرکت کریں اور اسے کامیاب بنائیں۔

مقتدٰی الصدر کے ایک قریبی رفیق عبدالہادی الدراجی نے کہا کہ عراقی عوام امریکی فوج کا انخلاء چاہتے ہیں کیونکہ اب وہ خود اپنے معاملات چلا سکتے ہیں۔

انہوں نے کہا عراقی پولیس اور سیکیورٹی دستے ملک میں سلامتی کا انتظام کرسکتے ہیں۔ عراق میں عام سویلین لوگوں کے خلاف ساری دہشت گردی باہر سے آئی ہے۔ میں چہلم پر ملک بھر میں انتظامات کے بعد یہ یقین سے کہہ سکتا ہوں کہ عراقی اپنے معاملات خود چلاسکتے ہیں۔

یہ مظاہرے ایک ایسے وقت ہوئے ہیں جب صدام حسین کے اقتدار کے خاتمے کے دو سال بعد عراق میں پچاس برس کے عرصے میں پہلی منتخب حکومت بنانے کے تیاریاں جاری ہیں۔

بی بی سی کی نمائندہ کیرولین ہاؤلی کا کہنا ہے کہ سیاسی تبدیلی کے آغاز کے باوجود زیادہ تر عراقی تشدد کی کارروائیوں، بے روزگاری اور بنیادی ضروریاتِ زندگی کی عدم دستیابی سے پریشان ہیں۔

دوسری جانب بغداد کے جنوب میں ایک حملے میں مزاحمت کاروں نے پندرہ عراقی فوجیوں کو ہلاک کردیا ہے۔

پولیس حکام کے مطابق حملہ لطیفیہ نامی قصبے کے نزدیک اس علاقے میں کیا گیا جسے ’موت کی تکون‘ کہا جاتا ہے۔ اس بات کی تصدیق نہیں ہو سکی ہے کہ فوجیوں کی موت کیسے واقع ہوئی۔ جائے حادثہ کے نزدیکی قصبے محمودیہ کے پولیس حکام نے خبر رساں ادارے رائٹرز کو بتایا کہ مسلح افراد نے فوجیوں کے ٹرک کو روکا اور پھر اس میں سوار فوجیوں پر فائرنگ کر دی۔

تاہم عراقی وزارتِ دفاع کے حکام نے اے ایف پی کو بتایا ہے کہ یہ فوجی سڑک کے کنارے نصب ایک بم پھٹنے سے ہلاک ہوئے ہیں۔