مائیکل ہوورڈ نے کہا کہ مجوزہ منصوبے کے تحت ہر سال بیس ہزار افراد کو برطانیہ آنے کی اجازت دینے کی حد رکھی جائے گی۔

ہوورڈ نے نشریاتی ادارے آئی ٹی وی کے ایک پروگرام پر انٹرویو دیتے ہوئے کہا کہ اس حقیقت کو تسلیم کرنا ہوگا کہ برطانیہ ایک حد سے زیادہ پناہ گزینوں کو نہیں ٹھہرا سکتا۔

کنزرویٹو پارٹی کا کہنا ہے کہ ان کی تجویز پر عملدرآمد کے نتیجے میں وہ لوگ زیادہ تعداد میں یہاں آ سکیں گے جو حقیقی معنوں میں پناہ گزیں ہوں گے۔

پناہ گزینوں کے لیے کام کرنےوالی کچھ تنظیموں کا خیال ہے کہ اس پالیسی سے پناہ گزینوں کی زندگیاں خطرے میں پڑ سکتی ہیں۔

مائیکل ہوورڈ نے کہا کہ یہ توقع کرنا غیر حقیقت پسندانہ ہے کہ برطانیہ سب پناہ گزینوں کو قبول کر سکتا ہے۔

انہوں نے کہا کہ برطانیہ ایک چھوٹا سا جزیرہ ہے جہاں پہلے ہی بہت رش ہے۔

مائیکل ہوورڈ کے والدین انیس سو انتالیس میں رومانیہ سے برطانیہ آئے تھے اور ان کا کہنا ہے کہ برطانیہ کے علاوہ بھی بہت سے مقامات ہیں جہاں پناہ گزیں جا سکتے ہیں۔