عیدالاضحی کے روز شیعہ مسجد پر حملے میں بیس افراد ہلاک ہوئے

یہ بات انہوں نے دارالحکومت بغداد میں جمعہ کے روز ایک شیعہ مسجد پر ہونے والے دو خودکش حملوں کے بعد اپنا ردعمل ظاہر کرتے ہوئے کہی۔ ان حملوں میں بیس افراد ہلاک ہوگئے تھے۔

ایاد علاوی نے کہا کہ انتخابات منعقد کرانے کے لئے سکیورٹی کے جو انتظامات کیے جارہے ہیں وہ مزاحمت کاروں کے تمام حملوں کو روکنے کے لئے کافی نہیں ہیں۔

علاوی نے، جو کہ ایک ٹی وی فون اِن پروگرام میں عراقیوں کے سوالات کا جواب دے رہے تھے، کہا کہ سکیورٹی فراہم کرنے کا ’منصوبہ قاتلانہ حملے روکنے کے لئے کافی نہیں ہے۔‘ ان کا کہنا تھا کہ مزاحمت کار ’سیاسی عمل کو ناکام بنانے کی کوشش‘ کررہے ہیں۔

بغداد میں بی بی سی کی نامہ نگار کیرولائن ہاؤلی کا کہنا ہے کہ عراقی انتخابات کے ہر پہلوؤں پر تشدد کا سایہ نمایاں ہے۔ کئی امیدوار مارے گئے ہیں اور متعدد کو ہلاک کرنے کی دھمکیاں ملی ہیں۔ جبکہ امیدوار انتخابی مہم ووٹروں کے دروازوں تک نہیں لے جارہے ہیں۔

عراق کے شیعہ مذہبی رہنما آیت اللہ علی سیستانی نے اپنے پیروکاروں سے اپیل کی ہے کہ وہ انتخابات میں حصہ لیں جبکہ سنی مسلم تنظیمیں انتخابات کے بائیکاٹ کا مطالبہ کررہی ہیں۔ عراق کے اٹھارہ صوبوں میں انتخابات تیس جنوری کو متوقع ہیں لیکن چار صوبوں میں تشدد حکومت کے کنٹرول سے باہر ہے۔

جمعرات کو اپنی ویب سائٹ پر شائع کردہ ایک بیان میں مزاحمت کاروں کے سرغنہ ابو مصعب الزرقاوی نے شیعہ برادری پر فلوجہ میں آیت اللہ علی سیستانی کے ’آشیرباد سے‘ سنی مساجد پر حملوں کا الزام لگایا۔ بیان میں کہا گیا ہے کہ امریکی افواج کے خلاف لڑائی ’مہینوں اور سالوں‘ تک چل سکتی ہے۔