یورپی ارکان پارلیمان ترکی کے حق میں ووٹ دیتے ہوئے

ژاک شیراک نے کہا کہ اگر ترکی یورپی یونین میں شمولیت کی رکنیت کی تمام لوازمات مکمل طور پر پورا کرتا ہے تو اسے یونین میں شامل ہونے دینا چاہئے۔ انہوں نے کہا کہ یورپی یونین کے پچیس ارکان میں سے کوئی ملک بھی ترکی کی شمولیت کو ویٹو کرسکتا ہے اور فرانس کو بھی ’حتمی فیصلہ‘ کرنے کا اختیار ہے۔

فرانس کے عوام کی اکثریت یورپی یونین میں ترکی کی شمولیت کے خلاف ہے۔ مبصرین کا کہنا ہے کہ عوام سے ٹی وی پر خطاب کے ذریعے ژاک شیراک نے فرانسیسی عوام کو اعتماد میں لینے کی کوشش کی ہے۔

اسی ہفتے فرانسیسی اخبار لی فیگارو میں شائع ہونے والے رائے شماری کے ایک جائزے کے مطابق فرانس کی دو تہائی آبادی یورپی یونین میں ترکی کی رکنیت کے خلاف ہے۔ ژاک شیراک نے اپنے خطاب میں کہا کہ ترکی کی شمولیت سے یورپ کو فائدہ پہنچے گا۔

ژاک شیراک نے اپنے خطاب میں سوال کیا: ’کیا یورپ، اور بالخصوص فرانس، کا ترکی کی رکنیت میں کوئی مفاد ہے؟‘ فرانسیسی صدر کا کہنا تھا: ’میرا جواب ہے۔۔۔ ہاں، اگر ترکی وہ شرائط پورے کرلیتا ہے جو ہم ہمارے یونین میں شمولیت کے لیے کسی امیدوار پر عائد کرتے ہیں۔‘

ترکی یورپی یونین میں شامل ہونے والا سب سے بڑا ملک ہوگا۔ ساتھ ہی یہ مسلم اکثریت والا پہلا ملک ہوگا جو یورپی یونین میں شامل ہوگا۔

ژاک شیراک کا بیان یورپی یونین کی پارلیمان کے اس فیصلے کے چند گھنٹوں کے اندر ہی آیا ہے جس کے تحت ارکان پارلیمان نے ایک غیرمشروط قرارداد کے ذریعے ترکی کی یورپی یونین میں ’بلاتاخیر‘ شمولیت کی حمایت کی ہے۔

ترکی کے وزیراعظم طیب اردغان نے یورپی پارلیمان کی حمایت کا خیرمقدم کیا ہے تاہم انہوں نے وارننگ دی کہ ان کا ملک رکنیت کی کوشش چھوڑ دے گا اگر ’ناقابل قبول شرائط‘ ابھر کر سامنے آئے۔

جمعرات اور جمعہ کے روز برسلز میں ایک اجلاس کے دوران یورپی رہنما یہ فیصلہ کریں گے کہ کب، کہاں اور کن حالات میں ترکی کی رکنیت کے بارے میں ترک حکومت کے ساتھ مذاکرات شروع کیے جائیں۔ ان رہنماؤں کو یہ بھی فیصلہ کرنا ہے کہ آیا ترکی سے مذاکرات ہونا چاہئے یا نہیں۔