 |  اصلاحات کے پیکج پر ملک میں بحث چھڑ گئی |
ترکی کی پارلیمان نے فوجداری قوانین میں اصلاحات کی منظوری دے دی ہے جس کے بعد اس کے یورپی اتحاد میں شمولیت کے امکانات بڑھ سکتے ہیں۔ تُرک مقننہ نے اصلاحات کے اس پیکچ کی منظوری ایک ہنگامی اجلاس میں دی۔ چھ اکتوبر سے یورپی اتحاد کی ایک رپورٹ پیش کی جائے گی جس میں فیصلہ کیا جائے گا آیا ترکی کے اتحاد میں شمولیت کے لیے مذاکرات شروع ہو سکتے ہیں یا نہیں۔ دس روز قبل ان اصلاحات پر ووٹنگ اس وقت روک دی گئی تھی جب کچھ ارکان نے شادی کے بغیر جنسی تعلقات کو جرم قرار دینے والی ایک شق منظور کرانے کی کوشش کی تھی۔ انقرہ میں بی بی سی کے نامہ نگار کا کہنا ہے کہ ان اصلاحات پر ابھی اعتراضات ختم نہیں ہوئے۔ کچھ لوگوں کو شکایت ہے کہ ان میں خواتین کے حقوق کے بارے میں مزید کچھ کرنے کی گنجائش ہے۔ اس کے علاوہ کئی شقوں کی ممکنہ تشریع کے بارے میں بھی اعتراضات اٹھائے گئے ہیں۔ لیکن عموماً جو لوگ ترکی کو جدید ملک کے طور پر دیکھنا چاہتے ہیں ان اصلاحات سے خوش ہیں۔ آسٹریا کا، جو ترکی کے یورپی اتحاد میں شمولیت کے بارے میں زیادہ پر جوش نہیں تھا، اب خیال ہے کہ ترکی کی رکنیت کے بارے میں مذاکرات شروع ہونے چاہیں۔ اصلاحات کے تحت ملک کے عدالتی نظام، آئین، فوج کے کردار، دیوانی قانون اور اقلیتوں کے حقوق کے بارے میں قوانین میں وسیع پیمانے پر تبدیلیاں کی گئی ہیں۔ یورپی کمیشن جو ترکی میں اصلاحات کے زیادہ تر عمل پر نظر رکھے ہوئے تھا ملک میں تبدیلیوں سے بہت خوش نظر آتا ہے۔ لیکن کچھ لوگوں کا کہنا ہے کہ منظور کیے جانے والے قوانین پر ابھی معنی خیز انداز میں عمل کیا جانا باقی ہے۔ | 
یہ صفحہ دوست کو ای میل کیجیئے
پرِنٹ کریں
