انتخابات نہ ہونے کی صورت میں ایاد علاوی کی حکومت غیرقانونی ہوگی

عراق کا عبوری پارلیمان ایک نئے آئین کا مسودہ تیار کرے گا۔ اس عبوری پارلیمان میں دوسو پچہتر نمائندے ہوں گے۔ فرید ایار نے بتایا کہ انتخابات میں شرکت کے لئے ایک سو پچانوے جماعتوں نے درخواستیں دی تھیں جن میں سے ایک سو بائیس منظور کرلی گئی ہیں۔

پھر ملک میں نئے آئین پر ایک ریفرنڈم کرایا جائے گا۔ ریفرنڈم کے بعد سن دوہزار پانچ کے اختتام سے قبل عام انتخابات منعقد ہوں گے جس میں عوام ارکان پارلیمان اور دیگر اعلیٰ عہدوں کے لئے ووٹنگ کریں گے۔

عراق میں انتخابات کا اعلان ایسے وقت کیا گیا ہے جب کئی شہروں میں مزاحمت کاروں کے حملے جاری ہیں۔ مبصرین کا کہنا ہے کہ عراق میں تشدد صرف ان شہروں میں ہے جہاں سنی اکثریت ہے جبکہ ملک کی شیعہ اکثریت، جس کی حالیہ عشروں میں حکومت میں نمائندگی نہیں رہی ہے، جلد انتخابات چاہتی ہے۔

بغداد میں بی بی سی کے نامہ نگار کا کہنا ہے کہ عبوری حکومت کے کچھ اہلکار اس بات پر شبہے کا اظہار کررہے ہیں کہ تیس جنوری کو انتخابات پرامن طور پر منعقد ہوسکے گیں۔

دریں اثناء عراق میں تشدد جاری ہے اور بغداد میں تشدد کی کئی کارروائیوں میں ایک امریکی فوجی سمیت چودہ افراد ہلاک ہوگئے ہیں۔

اطلاعات کے مطابق امریکی اور عراقی فوجی بغداد کے مختلف حصوں میں مزاحمت کاروں کے خلاف کارروائی میں مصروف ہے جنہوں نے شہر کے ایک تھانے پر حملہ کیا جس سے تین پولیس اہلکار ہلاک ہو گئے ہیں۔

عراقی حکومت کی ایک مشیر کواس وقت ہلاک کر دیا جب وہ بغداد میں اپنے دفتر سے گھر جا رہی تھیں۔