عراق میں امریکی فوج نے کہا ہے کہ اس کے طیاروں نے فلوجہ میں مزاحمت کارروں کے ٹھکانوں پر پانچ حملے کیے ہیں۔ فلوجہ پر فضائی حملے جمعہ کی صبح کو شروع ہوئے جو وقفے وقفے سے جاری رہے۔فلوجہ پر ایک زمینی آپریشن کی تیاری کی جا رہی ہیں اور عراق کی عبوری انتظامیہ کے سربراہ ایاد علاوی بھی خبردار کر چکے ہیں کہ اگر فلوجہ سے غیر ملکی جنگجوؤں کو نہ نکالا گیا تو فلوجہ پر ایک فوجی آپریشن ہو گا۔ عراق کی عبوری انتظامیہ کے صدر نے فلوجہ پر امریکی کے ممکنہ حملے کی مخالفت کی ہے اور کہا کہ اس سے مسائل بڑہیں گے۔ فلوجہ کے شہریوں نے کہا ہے کہ شہر کو جانے والے تمام راستوں کو بند کر دیا گیا ہے ۔ فلوجہ ہسپتال میں تعینات ڈاکٹروں کے مطابق امریکی طیاروں کی بمباری کے نتیجے میں کم از کم تین افراد ہلاک ہوئے ہیں۔ امریکی طیارے گزشتہ کئی روز سے فلوجہ میں عراقی مزاحمت کارروں کے ٹھکانوں پر مسلسل بمباری کر رہے ہیں۔ امریکی فوج کے ترجمان نے کہا کہ طیاروں نے عراقی مزاحمت کارروں کے اسلحہ کے ذخائر کو نشانہ بنایا ہے اور بہت سا اسلحہ تباہ کر دیا ہے۔
| 
یہ صفحہ دوست کو ای میل کیجیئے
پرِنٹ کریں
