ایک خود کش کار بم حملے میں برطانوی بلیک واچ رجمنٹ کے تین فوجی عراق میں ہلاک اور آٹھ زخمی ہوئے ہیں۔ بتایا گیا ہے کہ یہ اموات گشت کے دوران ہوئی ہیں۔ خودکش کار بم دھماکے کے بعد ایک مارٹر حملہ بھی کیا گیا۔ عراقی دارالحکومت بغداد میں بلیک واچ رجمنٹ کے ساڑھے آٹھ سو جوانوں کا تقرر کیا گیا ہے ان پر حملوں میں اضافہ ہو گیا ہے۔ یہ جوان بغداد سے بیس میل کے فاصلے پر کیمپ ڈاگ ووڈ میں متعین ہیں اور یہاں انہیں امریکی انتخابات سے قبل امریکی فوجیوں کی جگہ لایا گیا تھا اور اس مقصد کے لیے امریکہ نے درخواست کی تھی۔ بی بی سی کے نامہ نگار بن براؤن کے مطابق خدشہ ہے کہ ہلاک ہونے والوں میں ایک عراقی مترجم بھی شامل ہے۔ بتایا گیا ہے کہ عراق میں اب تک برطانیہ کے تیہتر فوجی اہلکار ہلاک ہو چکے ہیں۔ دریں اثناء بغداد کے شمال میں دیوجیل کے قصبے میں ایک خود کش کار بم حملے میں تین افراد ہلاک اور سات زخمی ہو گئے۔ پولیس کا کہنا ہے کہ دھماکہ خیر مواد سے لدی کار سرکاری دفتر کے باہر کھڑی گاڑیوں سے ٹکرائی اور ایک دھماکے سے پھٹ گئی۔ ایک اور واقعہ میں عراقی نیشنل گارڈ کی ایک پٹرول گاڑی سکندریہ میں ایک کاربم حملے کا نشانہ بنی جس میں، ہسپتال ذرائع کے مطابق تین ہلاک اور پندرہ زخمی ہوگئے۔ | 
یہ صفحہ دوست کو ای میل کیجیئے
پرِنٹ کریں
