عراق میں گرین زون کے اندر حملوں سے اقوام متحدہ پریشان ہے

ان خودکش حملوں میں پانچ افراد ہلاک ہو گئے تھے۔ پہلا حملے گرین زون کے اندر اس علاقے میں ہوا جہاں زیادہ تر غیر ملکی اور اقوام متحدہ کا عملہ مقیم ہے۔

اقوام متحدہ کے ترجمان نے کہا ہے کہ سیکریٹری جنرل کوفی عنان نے بغداد میں بڑھتے ہوئے خود کش حملوں کے بارے میں شدید تشویش کا اظہار کیا ہے۔

بی بی سی کے نامہ نگار کے مطابق جنوری میں انتخابات کا انعقاد کرانے کے لیے مزید عملہ عراق بھیجنے کے لیے اقوام متحدہ شدید دباؤ کا شکار ہے۔ تاہم یہ بات سکیورٹی کی صورت حال پر منحصر ہے کہ اقوام متحدہ مزید عملہ عراق بھیجتا ہے کہ نہیں۔

چند ماہ قبل بغداد میں اقوام متحدہ کے ہیڈ کواٹر پر حملے کے بعد اب اقوام متحدہ کا عملہ دوبارہ عراق پہنچنا شروع ہو گیا ہے لیکن ان کی تعداد کو پینتیس تک محدود رکھا گیا ہے۔