 |  بمبانگ ہریمورتی تحقیقی صحافت کی وجہ سے جانے جاتے ہیں |
انڈونیشیا کے ایک مشہور جریدے کے مدیر کو ہتک عزت کے مقدمے میں ایک سال قید کی سزا سنائی ہے۔ ایک مشہور بزنس مین ٹامی ونیناتا نے ’ٹیمپو‘ میگزین کے ایڈیٹر بمبانگ ہریمورتی پر ہتک عزت کا دعوی کیا تھا۔ مقدمے کی وجہ سے لوگوں میں تشویش پائی جا رہی ہے اس لیے کہ مقدمہ انڈونیشیا کے کریمینل کوڈ کے تحت چلایا گیا ہے نا کہ پریس کے قانون کے مطابق۔ نامہ نگاروں کا کہنا ہے کہ یہ سزا انڈونیشیا میں صحافت کی آزادی پر ایک کاری ضرب ہوگی۔ جریدے نے مارچ 2003 میں ایک مضمون شائع کیا تھا جس میں الزام لگایا گیا تھا کہ جکارتہ میں کپڑوں کی مارکیٹ میں لگنے والی مشکوک آگ کے پیچھے ونیناتا کا ہاتھ تھا اس لیے کہ اس کے دوبارہ تعمیر کے ٹھیکے سے ونیناتا کو بہت مالی فائدہ ہوگا۔ جج سریپتو نے فیصلہ سناتے ہوئے کہا ’ہم نے ملزم کو قصوروار پایا ہے اور اسے ایک سال جیل کی سزا سناتے ہیں‘۔ جریدے کے ڈپٹی ایڈیٹر سکندر علی اور رپورٹراحمد توفیق کو اسی قسم کے الزامات سے بری کر دیا گیا۔ عدالت نے فیصلہ سنایا کہ جریدے کا مدیر اعلیٰ ذمہ دار ہے۔ جب عدالت نے فیصلہ سنایا تو عدالت میں موجود لوگوں نے اس کے خلاف نعرے لگائے۔ بمبانگ ہریمورتی فیصلے کے خلاف اپیل کریں گے۔ انہوں نے کہا کہ انڈونیشیا کی تاریخ میں یہ ایک افسوسناک دن ہے۔ انہوں نے کہا کہ ’اب چیف ایڈیٹر اپنا کام کرتے ہوئے خوف محسوس کریں گے۔ بمبانگ ہریمورتی اپنے جریدے میں تحقیقی صحافت کی وجہ سے جانے جاتے ہیں۔ ان کا کہنا ہے کہ انہوں نے خبر میں توازن پیدا کرنے کے لیے ٹامی ونیناتا کا نقطہ نظر بھی شامل کیا تھا۔ | 
یہ صفحہ دوست کو ای میل کیجیئے
پرِنٹ کریں
