دھماکے میں نو ہلاک اور ایک سو اسی زخمی ہوئے

انڈونیشیا کے دارالحکومت جکارتہ میں آسٹریلوی سفارت خانے پر ہونے الے دھماکے سے نو افراد ہلاک اور ایک سو اسی زخمی ہوگئے تھے۔

جان ہاورڈ نے کہا کہ انڈونیشیا کی پولیس کو ٹیلیفون سے ایک پیغام ملا جس میں شدت پسند تنظیم جماعۃ الاسلامیہ کے رہنما ابو بکر بشیر کی جیل سے رہائی کا مطالبہ کیا گیا تھا۔

آسٹریلیا کے وزیر خارجہ الیکزینڈر ڈاؤنر نے جمعرات کے دھماکوں کے ذمہ داروں کو پکڑنے کا عہد کیا ہے۔ جمعہ کو انہوں نے ایک اخباری کانفرنس کو بتایا: ’یہ ایک قاتل اور سفاک حملہ تھا۔۔۔ ہمارے اہلکار اس حملے کے ذمہ دار لوگوں کو پکڑنے کے لئے انڈونیشیا کی پوری مدد کریں گے۔‘

اس سے قبل انڈونیشیا کی پولیس نے کہا کہ اسے یقین ہے کہ حملہ آوروں نے دھماکہ خیز مادوں سے لدی ہوئی ایک وین کو اس حملے کے لئے استعمال کیا۔ پولیس نے کہا کہ اس بات کی تصدیق نہیں کی جاسکی ہے کہ یہ خودکش حملہ تھا تاہم وین میں خون کے دھبے پائے گئے ہیں۔

اس دھماکے سے ملی تین لاشوں کی ابھی شناخت نہیں ہوسکی ہے اور پولیس نے اس بات سے انکار نہیں کیا ہے کہ ان میں سے کچھ لاشیں خودکش حملہ آوروں کی ہوسکتی ہیں۔

اس حملے پر یہ قیاس آرائی کی جارہی ہے کہ دہشت گرد نو اکتوبر کو آسٹریلیا میں ہونیوالے انتخبات کے نتائج پر اثر انداز ہونا چاہتے ہوں گے۔

وزیر اعظم جان ہاورڈ نے کہا ہے کہ ان کا ملک دہشت گردی کے واقعات کے سامنے سر نہیں جھکائے گا۔

آسٹریلوی وزیر خارجہ الیکزینڈر ڈاؤنر نے کہا ہے کہ یہ سفارت خانے پر ہونیوالا یہ دھماکہ آسٹریلیا پر حملہ تھا۔ جمعرات کے اس دھماکے کی کئی ممالک نے مذمت کی ہے اور امریکی صدر جارج بش نے اسے ’تہذیب یافتہ لوگوں‘ پر حملہ قرار دیا ہے۔