سیستانی کی تصویر لیکر لوگ مارچ کرتے ہوئے

ان کے مشیروں کا کہنا ہے کہ اس منصوبے کے تحت وہ شہر سے تمام غیرملکی فوجیوں کی واپسی، تمام ہتھیاروں کا خاتمہ اور شیعہ ریڈیکل رہنما مقتدیٰ الصدر کی ملیشیا کے ارکان سے نجف پر عراقی پولیس کا کنٹرول چاہتے ہیں۔

آیت اللہ علی سیستانی لندن سے واپسی پر عراق کے جنوبی شہر بصرہ میں شب گزار رہے ہیں اور جمعرات کے دن نجف پہنچنے والے ہیں۔ انہوں نے اپنے تین نکاتی منصوبے کے بارے میں عراق کی عبوری حکومت کے نمائندوں سے بات چیت کی ہے۔

امید کی جارہی ہے کہ نجف پہنچنے پر وہ اس منصوبے کی تفصیلات کے بارے مزید انکشاف کریں گے۔ ایک بیان میں آیت اللہ علی سیستانی نے کہا: ’میں نجف کی خاطر آیا ہوں اور اس وقت تک نجف میں ہی رہوں گا جب تک بحران ختم نہیں ہوجاتا۔‘

دریں اثناء آیت اللہ علی سیستانی کے ہزاروں حمایتی مقدس شہر نجف کو بچانے کے لئے نجف تک مارچ کرنے کی ان کی اپیل پر پیروی کررہے ہیں۔ نجف کی طرف مارچ کرنیوالے ایک گروہ کے دو افراد بدھ کے روز کوفہ میں ہلاک ہوگئے۔

نجف کی پولیس کے سربراہ نے لوگوں سے کہا ہے کہ وہ شہر سے دور رہیں۔ خبررساں ادارے میجر جنرل غالب الجزاری کے حوالے سے کہا ہے: ’مارچ کرنیوالے اپنی جان خطرے میں ڈال سکتے ہیں۔‘ عراقی پولیس نجف میں گاڑیوں کے داخلے کی اجازت نہیں دے رہی ہے۔

مقتدیٰ الصدر کے حامی ابھی بھی نجف میں روضۂ علی پر کنٹرول بنائے ہوئے ہیں۔ بدھ کی شب امریکی طیاروں نے شیعہ ملیشیا کے ارکان پر پھر سے بمباری کی۔ نامہ نگاروں کا کہنا ہے کہ امید کی جارہی کہ آیت اللہ علی سیستانی نجف میں فوجی بحران کا حل نکال سکتے ہیں۔