کچھ عرصہ سے فلوجہ امریکی ہوائی حملوں کی زد میں ہے

تازہ ترین اطلاعات کے مطابق امریکی فوج نے بغداد کے مغرب میں فلوجہ شہر کےعلاقے شہدا کے گردونواح میں ہوائی حملے کے دوران ایک عمارت کو نشانہ بنایا اور تباہ کر دیا۔

علاقے کے ایک شہری نے، جس نے اپنا نام ظاہر نہیں کیا، بتایا ’میں نے ساڑھے دس بجے رات ایک شدید دھماکے کی آواز سنی جو شہدا کی طرف سے آئی۔ یہ ہوائی حملہ ایک گھر پر ہوا تھا‘۔

امریکی فوج نے پچھلے ایک ماہ میں فلوجہ میں کم از کم سات ہوائی حملے کیے ہیں جن میں کئی عمارتوں کو حملوں کا نشانہ بنایا گیا ہے۔ جولائی کے شروع میں ایک حملے میں تئیس افراد ہلاک ہوگئے تھے۔ امریکہ کا کہنا ہے کہ یہ عمارتیں ابومصعب الزرقاوی کے گروہ سے تعلق رکھنے والے انتہا پسندوں کے زیر استعمال تھیں۔

بغداد میں امریکی فوج کے ترجمان نے ہوائی حملے کی تصدیق کرنے سے انکار کرتے ہوئے کہا کہ انہیں ایسی کوئی اطلاع نہیں ہے۔