رفعت اورکزئی

حکمت یار سویت یونین کے خلاف جہاد میں پیش پیش رہے ہیں

پشاور میں اخبارات کو جاری کئے گئے ایک بیان میں گلبدین حکمت یار نے کہا کہ ’مجاہدین‘ صرف امریکی اور اتحادی فوجیوں کو نشانہ بنا رہے ہیں۔ انہوں نے کہا کہ کندوز میں چینی کارکنوں کو ’مجاہدین‘ نے نہیں بلکہ امریکی فوج نے ہلاک کیا تھا۔

انہوں نے کہا کہ بلوچستان کی بندرگاہ گوادر اور یوگوسلاویہ میں بھی امریکیوں نے ہی چینیوں پر حملہ کیا تھا۔

انہوں نے کہا کہ ان کے حامی طالبان کے معاملات میں مداخلت نہیں کر رہے اور نہ ہی طالبان کے ساتھ ان کا کوئی معاہدہ ہوا ہے۔ انہوں نے کہا کہ ان کے حامی اپنے طور پر امریکی اور اتحادی فوج کے خلاف افغانستان کو آزاد کرانے کے لیے جددجہد کر رہے ہیں جس کو انہوں نے جہاد قرار دیا۔

انہوں نے کہا کہ وہ لوگوں کو افغانستان میں آئندہ ہونے والے الیکشن میں حصہ نہ لینے کی تلقین کر رہے ہیں۔ انہوں نے کہا اگر کوئی ایسا امیدوار سامنے آتا جو فوری طور پر غیر ملکی فوجوں کی افغانستان سے چلے جانے کی بات کرتا تو وہ اس کی غیر مشروط طور پر حمایت کرنے کے لیے تیار تھے۔

انہوں نے کہا کہ ان کی تنظیم افغانستان میں اسلامی حکومت کے قیام تک جدوجہد جاری رکھے گی۔ انہوں نے کہا کہ ’کٹ پتلی حکمران‘ اور غیر ملکیوں کے ’غلاموں‘ سے بات چیت کرنا اسلامی اقدار کی خلاف ورزی ہو گی۔

دریں اثناء طالبان نے زابل میں ایک حملے میں دو افغان فوجیوں کو ہلاک اور دو کو زخمی کر دیا۔

حکام نے دو افغان فوجیوں کے ہلاک ہونے کی خبر کی تصدیق کرتے ہوئے دعویٰ کیا کہ اس حملے میں کئی طالبان بھی ہلاک ہو گئےتھے۔